Во северниот дел на Москва, околу 1:30 часот по локално време, се случила тешка сообраќајна несреќа во која загинал познатиот руски крипто-милионер Алексеј Долги. Несреќата се случила кога неговото „Ламборџини“ со голема брзина излетало од патот, удрило во заштитна ограда и се запалило.
Според првичните информации, автомобилот се движел со брзина над 150 километри на час, што е потврдено од безбедносните камери на автопатот. Долги ја загубил контролата на свиок, по што возилото се превртело и веднаш избувнал пожар.
Освен Долги, во автомобилот имало уште три лица. Едно лице загинало на местото, а уште две се пренесени во болница со тешки повреди. Полицијата и обвинителството работат на утврдување на причините за несреќата.
Руските медиуми потсетуваат дека Долги бил ставен на црната листа на неколку банки поради сомнение за перење пари. Познат бил и по екстремното возење: имал над 400 сообраќајни казни за пребрзо возење, а неговиот долг по основ на казни надминувал еден милион рубли.
Возилото „Ламборџини“ го поседувал нешто повеќе од една година, период во кој речиси постојано бил регистриран за опасно и непрописно возење. Полицијата најави детали по завршувањето на истрагата.
