Македонија

Три можни решенија за новиот Клинички центар: Алиу вели дека експертите ќе ја дадат последната препорака

Владата и Министерството за здравство разгледуваат три потенцијални решенија за идниот Клинички центар во Скопје, изјави министерот за здравство Азер Алиу во интервју за Радио Слободна Европа. Проектот се смета за стратешки и е дел од првата фаза на пошироката здравствена реформа.

Како можни опции се споменуваат:

Реконструкција и модернизација на постојниот клинички кампус. Изградба на сосема нов Клинички центар на нова локација. Префрлање на комплетниот комплекс во просторот кај ГОБ „8 Септември“.

Алиу нагласи дека процесот е во рана фаза и дека изборот ќе зависи од експертски процени за инфраструктурата, пристапноста и интеграцијата меѓу клиничките, академските и административните функции.

„Важно е Клиничкиот центар да остане тесно поврзан со Медицинскиот факултет, поради развојно-истражувачката работа. Потребно е решение што нема да ги наруши ни образовните, ни здравствените процеси“, рече Алиу.

Министерот објасни дека средствата од британскиот договор, во висина од 205 милиони евра, ќе се вложат во повеќе објекти низ државата. Во Кичево ќе се гради нова болничка зграда, во Тетово ќе се реконструира комплетниот капус, додека во Штип ќе се подигне нова зграда за Медицинскиот факултет и ќе се подобруваат постојните клинички капацитети.

Во втората фаза ќе следи анализа на останатите регионални здравствени центри, со цел децентрализација на услугите и рамномерна здравствена покриеност. Министерството веќе прави мапирање на инфраструктурата и кадарот, со план за формирање регионални институции кои поефикасно ќе одговараат на потребите на населението.

Македонија

Божиновска присуствуваше на шведската прослава на светлината

Вечерва Сања Божиновска присуствуваше на традиционалниот концерт во чест на Санта Луција, кој го организираше Шведската амбасада. Празникот е симбол на светлина, топлина и надеж во најтемните нордиски ноќи.

„Секогаш е убаво кога една традиција носи порака која допира подалеку од границите – дека светлината ја создаваме самите, и дека најмногу ни е потребна токму во студените, тивки моменти од годината“, изјави Божиновска.

Таа изрази благодарност до амбасадата за прекрасната атмосфера и можноста да ја почувствува оваа уникатна шведска традиција, која најавува доаѓањето на Божиќ со радост, музика и светлина.

Македонија

Сообраќајот на Евзони повторно во прекин од 17 часот

АМСМ информира дека од 17 часот повторно е блокиран сообраќајот на Граничниот премин Евзони (ГП Богородица).

Според последните информации, сообраќајот на државните патишта се одвива непречено, по суви коловози и со умерен интензитет надвор од градските средини. На македонските гранични премини нема подолги задржувања за влез или излез од државата.

АМСМ апелира до возачите да возат со прилагодена брзина, да ја почитуваат поставената сигнализација и да бидат особено внимателни на патиштата низ котлинските и клисурните делови, каде што постои ризик од одрони. Најкритични се делниците Катланово – Велес, Маврово – Дебар – Струга, Виница – Берово и Кочани – Делчево.

Македонија

Студентите имаат уште десет дена за апликација за ваучери

Министерството за дигитална трансформација потсетува дека студентите имаат рок до 20 декември 2025 година да аплицираат за ваучери за електронски уреди.

Досега се доделени 42.606 ваучери, од кои 27.426 веќе се искористени. Во рамките на владината програма, предвидени се вкупно 55.000 ваучери за студенти на додипломски студии запишани во учебната 2025/26 година.

Ваучерите можат да се искористат најдоцна до 31 декември 2025 година.