Република

Во Штип се одржа 30-та Семакедонска средба: Повик за заштита на правата на Македонците во соседството

Во Штип денес се одржа јубилејната 30-та Семакедонска средба, во организација на Здружението „Мирка Гинова“. На настанот присуствуваа Македонци од земјава и од соседните држави, при што главна тема беше положбата и правата на Македонците надвор од границите.

Претседателот на Здружението ОМО Илинден од Сандански, Кирил Тилев, посочи дека Македонците во Пиринскиот дел на Македонија и понатаму се соочуваат со ограничувања на основните човекови права, меѓу кои употребата на мајчиниот јазик и можноста за организирање во здруженија.

„Повеќе од 35 години се зборува за демократски реформи во Бугарија, но нема промени за Македонците. Нè притискаат, нè негираат и не ни дозволуваат да се организираме“, истакна Тилев, додавајќи дека барањата за регистрација на здруженија се одбивани повеќекратно.

Историчарот Никола Жежов предупреди дека бугарската пропаганда се проширува и кон Македонците во Албанија преку издавање бугарски документи. Според него, сиромаштијата и административните тешкотии се користат како средство за влијание врз етничката свест.

Претседателот на Сојузот „Македон“, Александар Јаневски, соопшти дека организацијата поднела 109 претставки до меѓународни институции за заштита на правата на Македонците во Грција и Бугарија, но досега без конкретен одговор. Тој нагласи дека борбата продолжува за враќање на граѓанските и имотните права, како и за правото на образование на македонски јазик.

Претседателот на Здружението „Мирка Гинова“, Стојан Димков, истакна дека оваа средба веќе три децении ги обединува Македонците од различни делови и има за цел зачувување на националниот идентитет и култура.

Република

Бојкоски: Дополнителни 7 милиони денари поддршка за РК Еурофарм Пелистер

Претседателот на Советот на Општина Битола, Бојан Бојкоски, соопшти дека се обезбедени дополнителни 7.000.000 денари финансиска поддршка за РК Еурофарм Пелистер.

„Битола стои зад шампионот“, објави Бојкоски, нагласувајќи дека средствата се предложени во координација со градоначалникот и советничката група на ВМРО-ДПМНЕ и коалицијата.

Од вкупната сума, 3.000.000 денари се предвидени како награда за освоената шампионска титула во македонската ракометна лига. Според Бојкоски, целта на дополнителната поддршка е зголемување на конкурентноста на клубот, задржување на шампионската титула во Битола и носење радост и спортска гордост за граѓаните.

Република

Коњановски: Преку танц младите испраќаат силна порака против врсничкото и дигиталното насилство

Во спортската сала на СОУ Гимназија „Јосип Броз Тито“ во Битола денеска се одржа меѓуучилишен танцов натпревар „Танц против насилство“, посветен на подигнување на свеста за врсничкото и дигиталното насилство меѓу младите.

Настанот беше организиран со цел промоција на ненасилна комуникација, почит, солидарност и позитивни вредности, при што учениците преку танц, емоција и креативен израз испратија јасна порака дека насилството не смее да биде прифатено.

На настанот учествуваа седум основни училишта од Битола со вкупно 49 ученици, кои преку кореографиите ја пренесоа својата визија за свет без насилство. Поддршката за реализација ја даде Општина Битола, во соработка со Здружението за развој на ромската заедница „Сумнал“, СОУ Гимназија „Јосип Броз Тито“ Битола и образовните институции.

Пред присутните се обрати градоначалникот на Битола, Тони Коњановски, кој истакна дека ваквите иницијативи се исклучително важни за создавање безбедна и здрава средина за најмладите.

„Ова не е само танцов или музички натпревар, туку силна порака дека како заедница сме против насилството, особено меѓуврсничкото и дигиталното насилство кое нè загрижува сите. Радува фактот што училиштата ја прифатија оваа иницијатива и што младите покажаа дека имаат свест и храброст да зборуваат против булингот“, порача Коњановски.

Организаторката и иницијаторка на настанот, Фатма Бајрам Аземовска од здружението „Сумнал“, нагласи дека „Танц против насилство“ е глас на младите кои преку уметноста повикуваат на почит, прифаќање и разбирање.

Во натпреварувачкиот дел учество зедоа ученици од ООУ „Даме Груев“, „Кирил и Методиј“, „Ѓорѓи Сугарев“, „Тодор Ангелевски“, „Елпида Караманди“, „Св. Климент Охридски“ и „Гоце Делчев“.

Жири-комисијата ја додели Гран при наградата на ООУ „Гоце Делчев“, признанието за најсилна порака против насилството на ООУ „Тодор Ангелевски“, а наградата за најкреативна кореографија ја добија учениците од ООУ „Кирил и Методиј“.

Република

Прилеп утре без струја: Планиран прекин од 06:30 до 11:00

Жителите на Прилеп и околните приградски населби утре, 21 декември 2025, ќе останат без електрична енергија во период од четири и пол часа. Од АД МЕПСО информираат дека прекинот ќе трае од 06:30 до 11:00 часот.

Причината за прекинот се планирани зафати за модернизација на електропреносната мрежа на потегот помеѓу Битола и Прилеп. Стручните екипи ќе демонтираат старо проводно јаже од 110 kV далекувод (ТС Битола 1 – ТС Прилеп 1) и ќе монтираат нов проводник.

АД МЕПСО апелира до домаќинствата и стопанските субјекти, особено оние кои работат наутро, да покажат разбирање за прекинот. Напонот се очекува да биде повторно воспоставен точно во 11:00 часот, а зафатиот се оценуваат како клучни за стабилно и сигурно функционирање на електропреносниот систем во иднина.