Американската војска разгледува можност за изградба на привремена база со капацитет од 10.000 луѓе во близина на Појасот Газа, како дел од планот за создавање меѓународни стабилизациски сили што би го надгледувале примирјето меѓу Израел и Хамас, објави „Блумберг“.
Според документите, Американската морнарица побарала понуди од компании за изградба на „самоодржлива база“ со 10.000 квадратни стапки канцелариски простор, која би функционирала 12 месеци. Локацијата се наведува како „во близина на Газа, Израел“.
Вашингтон со недели се обидува да обезбеди поддршка за создавање Меѓународни стабилизациски сили (МСС), составени од војници од други земји, кои би го надгледувале примирјето и би ја координирале обновата на енклавата. Портпаролот на ЦЕНТКОМ, Тим Хокинс, истакна дека „ниеден американски војник нема да биде распоредeн во самата Газа“.
Неименуван американски официјален претставник изјавил дека станува збор за рана фаза на планирање за можно стационирање на базата во јужен Израел, наменета за идните меѓународни сили.
Белата куќа објасни дека документот е внатрешен и не претставува официјална одлука, додека експертите наведуваат дека логистиката за демилитаризација на Хамас би барала голема база во близина на Газа.
Според „Блумберг“, компанијата која ќе го добие договорот ќе треба да обезбеди „клуч на рака“ услуга – изградба, храна, логистика, вода, струја, отпад, медицинска клиника и комуникациска мрежа.
Проектот би се реализирал преку системот WEXMAC на американската морнарица, кој се користи за меѓународни воени операции.
