Украинската влада денеска го разреши Герман Галушченко од функцијата министер за правда, соопшти премиерката Јулија Свириденко.
Според нејзината објава на „Телеграм“, Владата утрово одржала вонредна седница на која е донесена одлуката за негово разрешување, пренесува „Укринформ“. Свириденко додаде дека функцијата привремено ќе ја извршува заменичката министерка за правда задолжена за европски интеграции, Људмила Сугак.
Одлуката доаѓа по антикорупциската операција на Националното биро за борба против корупција (НАБУ), спроведена на 10 ноември, со цел откривање коруптивни активности во енергетскиот сектор.
Истражителите утврдиле дека членовите на една криминална група создале широка мрежа на влијание врз државни компании, особено врз државната нуклеарна компанија „Енергоатом“.
Според извори од истрагата, претреси биле извршени во домот на бизнисменот и косопственик на студиото „Квартал 95“, Тимур Миндич, како и во резиденцијата на министерот Галушченко, кој претходно ја извршуваше функцијата министер за енергетика.
На 11 ноември биле приведени пет лица во рамки на истрагата, а седуммина се осомничени. Претреси биле извршени и во просториите на „Енергоатом“ и во куќата на министерот Галушченко, јавуваат украинските медиуми.
