Русија и Мјанмар започнаа заеднички поморски вежби под името „Марумекс-2025“ во Андаманското Море, соопшти денес прес-службата на Руската пацифичка флота, пренесува ТАСС.
Според соопштението, маневрите започнале во средата, а во следните два дена екипажите на бродовите на руската и мјанмарската морнарица ќе вежбаат командување и координација при заеднички маневри, пребарување, откривање и следење на подморници на „симулиран противник“, како и борбени вежби со артилериско и торпедно гаѓање.
Покрај тоа, антитерористички тимови од двете земји ќе изведуваат сценарија за проверка и ослободување на пловни објекти што наводно ги зазеле „пирати“.
Главната цел на вежбите, се наведува во соопштението, е севкупен развој и зајакнување на поморската соработка, како и подобрување на безбедносните мерки за цивилното поморство и економските активности во поморските региони на Југоисточна Азија.
