Русија во ноќта меѓу 13 и 14 ноември изведе масовен воздушен напад врз Киев, користејќи стотици дронови и повеќe проектили.
Според официјалните извештаи, во нападот загинала најмалку една личност, а 24 се повредени, при што петмина – меѓу кои и бремена жена – се хоспитализирани. Низ целиот град се слушале силни експлозии, а погодени се бројни станбени згради, пишува Kyiv Independent.
Шефот на Воената управа на град Киев, Тимур Ткаченко, предупреди дека „Русите гаѓаат станбени згради“ и истакна дека повеќе висококатници биле погодени во речиси сите делови на градот. Градоначалникот на Киев, Виталиј Кличко, потврди дека во ноќниот напад биле погодени најмалку 11 висококатници.
Украинската Државна служба за вонредни состојби соопшти дека спасувачките екипи евакуирале повеќе од 40 лица од погодените згради. Забележани се удари, пожари и евакуации во населбите Подилски, Днипровски, Десњански, Соломенски, Свјатошински и Оболонски. Во Десњански изби пожар кој зафати катови од петти до осми на една висококатница, при што една личност загина.
Освен станбени објекти, оштетени се и болница, училиште и дрвени објекти на спортски центар. Кличко изјави дека е нанесена штета и на делови од градската топловодна мрежа, а службите работат на процена на целокупните последици. Во неколку градски квартови имало и прекини во снабдувањето со електрична енергија.
Во поширокиот регион на Киев повредени се шест лица, меѓу кои и едно дете, соопшти гувернерот Микола Калашник. Четири лица се хоспитализирани со исеченици, изгореници и повреди на главата, додека седумгодишно момче добило повреда на лицето и му била укажана медицинска помош. Според Калашник, оштетени се куќи, магацини, индустриски погони и автомобили.
Додека во Киев гореа згради, украинските воздушни сили соопштија дека биле забележани бранови дронови насочени кон централните, јужните и источните делови на земјата. Според надзорните групи, повеќе од 120 дронови и мамци биле упатени кон главниот град, а десетици крстосувачки и балистички ракети биле испукани кон различни региони. Предупредувања за воздушна опасност беа активни низ цела Украина.
Откако Русија ја започна агресијата во февруари 2022 година, редовно изведува напади со голем интензитет врз украинските градови. Последните месеци Москва ги засили ударите врз украинската енергетска инфраструктура, обидувајќи се да ја внесе земјата во уште една тешка зима.
Во претходниот голем напад на 8 ноември, тогашната министерка за енергетика Свитлана Хринчук изјави дека украинските градови претрпеле „еден од најмасовните директни напади со балистички ракети врз енергетските објекти“ од почетокот на агресијата. Тој напад принуди неколку градови, вклучително и Киев, да воведат повеќе од 12 часа итни рестрикции на електричната енергија за стабилизација на системот.
