Балкан

Албанската полиција уништи над 200.000 стебла марихуана за десет месеци

Во периодот јануари-октомври годинава, албанската полиција идентификувала и уништила вкупно 203.960 стебла марихуана, соопштија од Министерството за внатрешни работи. Од нив, 106.894 стебла биле откриени со воздушно следење, додека 97.066 со теренски контроли.

Регион Скадар во северниот дел на земјата останува најризичен, со уништени 105.591 стебла. Во почетната фаза на одгледување биле уништени и 17.447 садници, а запленета е и поголема количина семе марихуана.

Во извештајниот период биле откриени 580 случаи на одгледување марихуана, во кои биле инволвирани 191 лице. Од нив, 106 се уапсени, 36 се приведени, 17 се бранат од слобода, а по 32 лица се трага. Генералниот директор на полицијата, Илир Прода, истакна дека споредено со истиот период минатата година, површините со ова наркотично растение се намалени, што резултирало со помал број уништени стебла и садници.

Прода додаде дека во текот на годината кривично се гонети 163 лица за злоупотреба на службена должност и непријавување кривично дело, меѓу кои селски старешини, административци, вработени во електродистрибуција и шумски инспектори.

Тој нагласи дека борбата против одгледувањето марихуана останува национален стратешки приоритет и бара континуирана меѓународна соработка.

Балкан

Атина: 38 приведени за време на годишнината од убиството на тинејџерот

Во центарот на Атина вечерва избувнаа судири меѓу демонстранти и полицијата за време на маршот по повод 17-годишнината од убиството на Александрос Григоропулос. Полицијата употреби солзавец и шок-бомби, а 38 лица беа приведени, од кои осум се уапсени.

Тензии се појавија кога дел од демонстрантите се обидоа да се упатат кон квартот Егзархија, но полицијата ги спречи. Метро станиците „Панепистимио“ и „Синтагма“ беа затворени од 17 часот по наредба на властите.

Слични протести се одржаа и во Солун, каде беа приведени десет лица. Убиството на 15-годишниот Григоропулос во 2008 година останува симбол на борбата против полициската бруталност, а годишнината и годинава беше обележана со судири и засилено полициско присуство.

Балкан

Брод со мигранти се превртел кај Крит: 18 загинати, двајца преживеани

Грчката крајбрежна стража пронајде брод со 18 загинати мигранти покрај брегот на Крит, јави грчката јавна телевизија ERT News. Двајца преживеани изјавиле дека ја изгубиле контролата над бродот за време на бура, останувајќи на отворено море без вода и храна.

Сè уште не е познато од каде потекнуваат жртвите, а форензичарите и истражителите работат на утврдување на околностите околу несреќата. Моќна бура беснее во морето околу Крит, со налети на ветер над 90 километри на час.

Според УНХЦР, криумчарски банди продолжуваат да испраќаат мигранти по опасната рута од Тобрук во Либија кон Крит, а речиси 17.000 мигранти пристигнале на островот до почетокот на декември 2025 година.

Балкан

(ВИДЕО) Автомобил „полета“ над кружен тек – дијабетска криза ја предизвикала несреќата

Тешка сообраќајна несреќа се случи во Романија кога возач на „мерцедес“ ја изгуби контролата врз автомобилот и буквално прелета над две возила на кружен тек.

Mercedes flies over 2 cars in Romania, a 55-year-old driver lost control due to a medical problem, but he survived the crash with moderate injuries, and refused hospitalization pic.twitter.com/YoGn1YZuOZ
— Global Eye News🌐 (@globaleeyenews) December 5, 2025

На видеото кое кружи на социјалните мрежи јасно се гледа дека автомобилот возел со голема брзина, ја пресекол кружницата и „полетал“ над другите возила пред да удри во столб на надзорна камера и да застане на зелена површина покрај блиска бензинска пумпа.

Возачот, 55-годишен маж, останал заробен во автомобилот, но спасувачите успеале да го извлечат. Тој претрпел само полесни повреди и е однесен во болница на контрола, без потреба од хоспитализација.

Тестовите покажале дека не консумирал алкохол или дрога, а причината за несреќата е дијабетска криза која го спречила да реагира додека возел.