Министрите за надворешни работи на земјите членки на Европската унија усвоија нов пакет санкции насочени кон, како што наведуваат, „хибридните и дестабилизирачки активности“ на Русија. Со одлуката се санкционирани дополнителни 12 физички и две правни лица, со што вкупниот број опфатени со рестриктивни мерки достигна 59 физички и 17 правни субјекти.

На листата се најдоа аналитичари за надворешна политика поврзани со институции, тинк-тенкови и универзитети блиски до Кремљ, како и јавни личности обвинети за ширење проруска пропаганда, теории на заговор за војната во Украина и наративи насочени против Украина и НАТО. Дел од санкционираните се и поранешни воени и полициски службеници од земји на Западна Европа.

ЕУ воведе санкции и против Меѓународното движење на русофилите, кое Брисел го обвинува за ширење на дестабилизирачки пораки во согласност со позициите на руската влада. Санкциониран е и 142-от баталјон за електронско војување со седиште во Калининград, за кој се тврди дека е вклучен во попречување на комуникациски системи и електронско војување, вклучително и дефекти на GPS сигналот во неколку земји членки.

На списокот се најдоа и припадници на руската воена разузнавачка служба ГРУ, како и сајбер-групата „Cadet Blizzard“, обвинета за изведување сајбер напади врз владини институции во Украина, ЕУ и земјите на НАТО со цел прибирање чувствителни информации и политичка дестабилизација.

Покрај тоа, санкционирани се уште пет физички и четири правни лица поврзани со поддршка на таканаречената руска „флота во сенка“. Меѓу нив има бизнисмени поврзани со нафтените компании „Росњефт“ и „Лукоил“, како и превознички фирми од Обединетите Арапски Емирати, Виетнам и Русија, чии танкери, според ЕУ, учествуваат во заобиколување на забраната за извоз на руска нафта.

Италијанската премиерка Џорџа Мелони изјави дека нејзината влада нема да се откаже од планот за отворање центри за мигранти во Албанија, и покрај сериозните правни пречки и критики. Таа останува убедена дека проектот ќе се реализира според предвиденото.

„Сè оди точно како што отсекогаш ви велев: центрите во Албанија ќе работат“, порача Мелони на собир на нејзината партија „Браќа на Италија“ во Рим, обраќајќи им се на поддржувачите.

Мелони се повика на неодамнешниот договор меѓу земјите членки на Европската Унија во Брисел, со кој се најавува построг пристап кон миграцијата. Според договорот, ЕУ ќе го зголеми притисокот врз одбиените баратели на азил и ќе работи на поефикасни депортации.

Во рамките на овие политики, се разгледува можноста за воспоставување центри за враќање во земји надвор од ЕУ, меѓу кои и Албанија, иако овие планови сè уште чекаат конечна одлука и одобрување.

Досега, иницијативата на италијанската влада за масовно враќање на одбиени баратели на азил, дури и пред нивно влегување на италијанска територија, се соочи со ограничен напредок. Дополнително, неколку судски одлуки од италијански и европски институции го забранија префрлањето на постапките за азил во Албанија.

На Германско-украинскиот економски форум во Берлин, германскиот конзервативен лидер Кристијан Мерц истакна дека планот за користење на руски државни средства за помош на Украина е од суштинско значење за Европската Унија. Тој нагласи дека за успехот сите земји-членки треба да учествуваат и да сносат истиот ризик.

Белгија моментално го блокира планот, стравувајќи од можна законска одговорност за средствата, кои најголем дел се наоѓаат во белгиски банки, додека Унгарија исто така има забелешки од други причини.

Мерц предупреди дека неуспехот би предизвикал долгорочна штета по способноста на ЕУ да дејствува и дека светот ќе види дека Европа не е подготвена да застане обединето во критичен момент.

Тој додаде дека Европа мора да ја поддржи Украина во нејзината одбранбена борба, нагласувајќи дека Москва продолжува со воените операции и со брутални напади врз цивилната инфраструктура, што Украина го чувствува на почетокот на четвртата воена зима.