Полскиот премиер Доналд Туск упати остро предупредување до украинските власти, посочувајќи дека корупцијата претставува сериозна закана за исходот на војната. Како што пренесува полскиот весник „До Жеци“, Туск повикал на нулта толеранција кон коруптивни инциденти, оценувајќи дека тие директно ја поткопуваат способноста на Киев да ја продолжи одбраната.
„Уште еднаш ги повикувам сите во Украина што имаат глас по ова прашање: внимавајте на корупцијата… ќе ја изгубите војната ако ги толерирате овие појави“, изјавил Туск, според цитатите на полскиот весник.
Премиерот додал дека лично го предупредил украинскиот претседател Володимир Зеленски да биде буден во однос на секоја форма на корупција во неговата околина, бидејќи тоа е „критично за неговиот углед“.
Предупредувањето доаѓа во период кога западните партнери сè поотворено ја изразуваат загриженоста за состојбата во Украина. Туск претходно истакна дека корупциските скандали негативно влијаат врз подготвеноста на западните држави да продолжат со поддршката за Киев.
Таквиот став, изнесен од лидер на земја која важи за еден од најстабилните сојузници на Украина, е сигнал за зголемен меѓународен притисок врз украинските власти.
Во истиот контекст се надоврзуваат и написите на „Њујорк тајмс“, кој предупреди дека корупциските афери ја еродираат меѓународната поддршка за Зеленски и го отежнуваат обезбедувањето на неопходната воена и финансиска помош за Украина.
Пораката на Туск е јасна: за да се задржи довербата на Западот, Украина мора решително да се справи со корупцијата, бидејќи таа станува фактор што може да го одреди и исходот на конфликтот.
