За време на акцијата за засилена сообраќајна контрола, српската полиција пресретна 26-годишен возач М.В., кој управувал „порше“ со 233,2 километри на час на автопатот Белград – Нови Сад, во близина на Сурчин. На овој дел од патот максимално дозволената брзина изнесува 130 километри на час.

Министерството за внатрешни работи информира дека возачот е веднаш исклучен од сообраќај и против него е поднесена прекршочна пријава за насилно возење.

Од МВР додаваат дека во изминатите четири дена, откако започна акцијата, сообраќајната полиција контролирала околу 40.000 возила и открила повеќе од 22.500 прекршоци, од кои 33 се класифицирани како насилно возење. Акцијата ќе продолжи до недела, 7 декември.

Граничниот премин Евзони денеска ќе биде затворен за сите видови сообраќај во два временски периода – од 10:00 до 14:00 часот и од 18:00 до 22:00 часот – поради протест, информира АМСМ. Во овој интервал нема да биде возможен ниту влез ниту излез од Грција.

Од АМСМ соопштуваат дека сообраќајот на државните патишта се одвива нормално, по делумно влажни коловози. Интензитетот на движење надвор од градските средини е умерен.

На граничните премини се бележат умерени задржувања: на „Дојран“ времето на чекање за излез од државата е околу 30 минути, додека на „Табановце“ задржувањата достигнуваат до 40 минути. На останатите премини од македонска страна нема подолги чекања.

Патниците се повикуваат да го приспособат времето на патување согласно блокадите и актуелните состојби на граничните премини.

Речиси два месеци откако стапија на сила американските санкции врз Нафтената индустрија на Србија (НИС), во земјата не пристигнала ниту капка сурова нафта. И покрај тоа, снабдувањето со нафтени деривати е стабилно, а надлежните уверуваат дека граѓаните и економијата засега немаат последици од застојот.

Американската администрација ја продолжи лиценцата за работење на руската компанија Лукоил до 29 април, што им овозможува на странските подружници, вклучително и оние кои снабдуваат нафтени деривати во Србија, да продолжат со увоз.

Претседателот Александар Вучиќ изјави дека 112 бензински пумпи во Србија ќе можат да работат со увезени деривати и нагласи дека земјата нема да има проблеми со снабдувањето со гас, со оглед на тоа што се очекува потпишување на краткорочен договор.

Министерката за енергетика, Дубравка Ѓедовиќ Хандановиќ, истакна дека состојбата со НИС се следи постојано и дека главен приоритет е сигурноста на снабдувањето. Таа повторно остварила контакти со повеќе компании, меѓу кои MOL, OMV, EKO и „Кнез петрол“, за да се обезбедат алтернативни количини.

Енергетската соработка меѓу Србија и Русија, како и снабдувањето со гас и стратешките инфраструктурни проекти, била главна тема и на средбата меѓу Вучиќ и рускиот амбасадор Александар Боцан-Харченко.

Затворањето на рафинеријата во Панчево ги загрижи вработените во НИС, поради што синдикатите бараат јасно објаснување од раководството за понатамошните чекори и иднината на компанијата.