Унгарскиот премиер Виктор Орбан изјави дека украинскиот конфликт би можел да заврши во догледно време и дека „сме многу блиску до мир“.
Во интервју за германската медиумска група „Аксел Шпрингер“, Орбан оцени дека колективниот Запад мора да усогласи единствен став за да се постигне договор, бидејќи во моментов меѓу западните земји нема консензус за украинското прашање.
Додека претседателот на САД, Доналд Трамп, промовира мировни иницијативи, Европа се залага за продолжување на војната со надеж дека ќе обезбеди подобра преговарачка позиција, наведе Орбан.
На прашањето дали рускиот претседател Владимир Путин е заинтересиран за мировни разговори, Орбан одговори дека е – бидејќи „војната има цена“. Таа цена, објасни тој, се мери во човечки животи и економски загуби. Според Орбан, Русија би сакала што побрзо да го заврши конфликтот, но истовремено настојува да ги оствари своите цели.
Тој додаде дека Европа троши огромни средства за финансирање на Киев во време кога тие средства ѝ се неопходни токму нејзе, додека Украина е погодена од корупциски скандали.
