Американскиот претседател Доналд Трамп соопшти дека републиканците во Конгресот подготвуваат нов закон кој предвидува остри санкции за сите земји што продолжуваат да соработуваат со Русија. Тој истакна дека меѓу потенцијалните цели се наоѓа и Иран, клучен воен партнер на Москва.
„Секоја земја што соработува со Русија ќе биде санкционирана многу строго“, изјави Трамп во Палм Бич, Флорида.
Новото законодавство доаѓа по серија мерки преземени од администрацијата на Трамп во последните месеци. Во октомври САД воведоа санкции кон најголемите руски енергетски компании – „Роснефт“ и „Лукоил“ – како и нивните подружници. Иако санкциите за „Лукоил“ беа планирани да стапат на сила на 21 ноември, Министерството за финансии ги одложи за да му овозможи на концернот време да ги продаде странските средства.
Вашингтон воведе и 50% царини на увозот од Индија, која останува еден од најголемите купувачи на руска нафта. САД предупредуваат дека би можеле да следат вторични санкции ако нема напредок во мировните иницијативи во Украина.
Трамп додаде дека Иран најверојатно ќе биде вклучен во новиот пакет мерки, нагласувајќи дека Техеран е значаен снабдувач на руските воени операции од почетокот на инвазијата врз Украина.
