Во рамките на двегодишната иницијатива на Мисијата на ОБСЕ во Скопје, во Битола се одржа нова средба за унапредување на дијалогот и соработката меѓу полицијата, општинските власти и ромската заедница. Настанот беше дел од континуираните напори за градење доверба, институционална координација и активно вклучување на заедницата.
Дискусиите на средбата се фокусираа на два важни предизвици – малолетничките бракови и домашното насилство. Учесниците ги разгледаа резултатите од работилниците и теренските активности на иницијативата „НЕ за малолетнички бракови“, спроведувана со поддршка на СВР Битола и здружението „Сумнал“. Вториот дел од состанокот се посвети на безбедноста на заедницата и односите помеѓу полицијата, општината и ромската заедница.
Градоначалникот Тони Коњановски се заблагодари за поддршката од Мисијата на ОБСЕ и истакна дека активностите значајно придонеле за подобрување на односите и инклузијата на ромската заедница.
„Мисијата на ОБСЕ ги обедини претставниците на ромската заедница и полициските службеници, создавајќи услови за меѓусебно разбирање. Европската унија го поздрави формирањето на работната група во Битола, која придонесува за унапредување на односите и еднакви можности за сите деца,“ истакна Коњановски.
Мисијата на ОБСЕ ја потврди подготвеноста да продолжи со поддршка на Битола преку активности со брз ефект и долгорочни стратешки интервенции.
