На денешната седница на Националниот совет за евроинтеграции, претседателот на СДСМ, Венко Филипче, упати сериозни критики кон владата, истакнувајќи дека Македонија стои во место поради недоволна политичка волја за суштински реформи.
„Јасно се гледа од извештајот дека реформи нема, го губиме времето. Ова е еден од најлошите извештаи кои државата ги добила, полош само од оној во 2015 година, кога бевме оценети како заробена држава“, рече Филипче.
Тој посочи дека нема напредок во клучни области и дека државата ризикува нови услови за отворање на преговорите со ЕУ. Особено ја потенцираше состојбата во правосудството, борбата против корупцијата, медиумските реформи, економијата и образованието, каде Европската комисија забележала или застој, или назадување.
„Генералната независност и финансиската автономија на правосудството се поткопани, нема напредок во борбата против корупцијата, ниту во клучните економски реформи. Одговорноста е целосно на владината коалиција“, истакна Филипче.
