Русија изведе нов бран напади врз Одескиот и Харковскиот регион, при што има загинати, повредени и значителни оштетувања на енергетската и транспортната инфраструктура.
Во регион на Одеса едно лице е повредено по дрон-напад што предизвика пожари на енергетски и пристанишни објекти, соопшти украинската Државна служба за вонредни ситуации. Пожарите биле брзо локализирани благодарение на интервенцијата на специјализираните тимови, кои и натаму работат на расчистување и обезбедување на погодените локации. Според регионалните власти, експлозии од нападите се слушале во повеќе градови, а надзорот на клучната инфраструктура е дополнително засилен.
Истовремено, Харковскиот регион беше цел на ракетни напади во кои загинаа три лица, а единаесет се повредени, соопшти началникот на регионалната воена управа, Олег Синегубов. Меѓу повредените има и тројца тинејџери. Во Балаклија, каде што ракетата погодила централно градско подрачје, оштетени се повеќекатни згради и уништени се бројни возила. Деветмина од повредените се хоспитализирани, меѓу нив и млади лица, потврди локалната администрација.
Напади имало и во Изјум, каде 14-годишен тинејџер е повреден, а делови од регионот останале без електрична енергија поради оштетување на мрежата.
Овие удари се дел од продолжената ескалација во источна и јужна Украина. Киев предупредува дека Москва систематски ги таргетира енергетските и логистичките капацитети за да го ослабне функционирањето на државата во услови на претстојната зима.
Украинските служби остануваат во засилен режим, а енергетските екипи работат на стабилизирање на системите и обезбедување поддршка за населението погодено од последните напади.
