Американскиот претседател Доналд Трамп изјави дека и покрај растечката фрустрација кон рускиот претседател Владимир Путин, не е подготвен да се откаже од него. „Разочаран сум, но не сум завршил со него“, рече Трамп во ексклузивно интервју за Би-Би-Си.
Трамп, кој неодамна ја промени политиката околу Украина, објави дека САД ќе испратат оружје во земјата, вклучувајќи системи за воздушна одбрана и батерии „Патриот“, преку европските земји кои купуваат американско оружје. Ова доаѓа во време кога Москва продолжува со бомбардирањето и одбива да се согласи на прекин на огнот.
Како дел од новиот план на Белата куќа, Трамп се закани со воведување строги царини за Русија доколку не се согласи на прекин на огнот во рок од 50 дена. Американскиот лидер призна дека не му верува „скоро на никого“, но додава дека ќе продолжи да одржува контакти со Путин.
„Ќе имаме одличен разговор. Ќе кажам: ‘Тоа е добро, мислам дека сме блиску до завршување’, а потоа ќе урнат зграда во Киев“, коментира Трамп со својот типичен ироничен тон.
Во Белата куќа, тој се пошегува со новинарите дека веднаш ќе ѝ јави на Првата дама за разговорот со Путин, на што таа би реагирала со потсетување дека уште еден украински град е погоден.
Трамп, кој во изборната кампања повеќе пати ветуваше дека ќе ја заврши војната во Украина, сега го засилува својот притисок врз Русија, но одржува директна линија со Кремљ.
