Македонија

Имињата на докторите и болниците кои направиле непотребни операции ќе бидат објавени

Министерот за здравство, Азир Алиу, најави дека имињата на болниците и лекарите кои непотребно упатувале пациенти на операции на срце и извршиле непотребни интервенции ќе бидат јавно објавени откако ќе заврши конечниот извештај на комисијата.

Во интервју за емисијата „360 степени“ на МРТ 1, Алиу појасни дека објавувањето ќе следи по завршувањето на втората фаза од процесот, кога ќе се вклучат и тројца меѓународни експерти.

„Сè уште е драфт-верзија. Надворешните експерти можеби ќе имаат различен наод, па извештајот ќе се анализира уште еднаш заедно со нив“, рече Алиу.

Министерот нагласи дека комисијата брои 15 стручни членови, вклучувајќи лекари од државни и приватни институции, и дека одлуките се носат со мнозинство. За секој случај постојат детални записници, административни и клинички документи, кои се целосно проверливи.

„Еден или два гласа не можат да го променат резултатот. Сите наоди се документирани и анализирани со компјутери и видеобим“, додаде Алиу.

Конечниот извештај ќе биде објавен на веб-страницата на Министерството, а по неговото добивање ќе се подготви и акциски план за зајакнување на системските механизми и спречување на слични случаи во иднина.

Министерот истакна дека целта е целосна транспарентност и зачувување на довербата во кардиохируршките и васкуларните услуги.

„Крајниот извештај нема да биде само информација за пациентите кои биле скенирани, туку ќе ни послужи како патоказ за измени во закони и креирање на акциски план за зајакнување на здравствениот систем“, изјави Алиу.

Македонија

Божиновска присуствуваше на шведската прослава на светлината

Вечерва Сања Божиновска присуствуваше на традиционалниот концерт во чест на Санта Луција, кој го организираше Шведската амбасада. Празникот е симбол на светлина, топлина и надеж во најтемните нордиски ноќи.

„Секогаш е убаво кога една традиција носи порака која допира подалеку од границите – дека светлината ја создаваме самите, и дека најмногу ни е потребна токму во студените, тивки моменти од годината“, изјави Божиновска.

Таа изрази благодарност до амбасадата за прекрасната атмосфера и можноста да ја почувствува оваа уникатна шведска традиција, која најавува доаѓањето на Божиќ со радост, музика и светлина.

Македонија

Сообраќајот на Евзони повторно во прекин од 17 часот

АМСМ информира дека од 17 часот повторно е блокиран сообраќајот на Граничниот премин Евзони (ГП Богородица).

Според последните информации, сообраќајот на државните патишта се одвива непречено, по суви коловози и со умерен интензитет надвор од градските средини. На македонските гранични премини нема подолги задржувања за влез или излез од државата.

АМСМ апелира до возачите да возат со прилагодена брзина, да ја почитуваат поставената сигнализација и да бидат особено внимателни на патиштата низ котлинските и клисурните делови, каде што постои ризик од одрони. Најкритични се делниците Катланово – Велес, Маврово – Дебар – Струга, Виница – Берово и Кочани – Делчево.

Македонија

Студентите имаат уште десет дена за апликација за ваучери

Министерството за дигитална трансформација потсетува дека студентите имаат рок до 20 декември 2025 година да аплицираат за ваучери за електронски уреди.

Досега се доделени 42.606 ваучери, од кои 27.426 веќе се искористени. Во рамките на владината програма, предвидени се вкупно 55.000 ваучери за студенти на додипломски студии запишани во учебната 2025/26 година.

Ваучерите можат да се искористат најдоцна до 31 декември 2025 година.