Велика Британија не е подготвена да се одбрани од широкоразмерен воен напад и сериозно заостанува во исполнувањето на обврските од Член 3 на НАТО, покажува најновиот извештај на Одбранбениот комитет на британскиот парламент. Истражувањето траело една година и предизвика силни реакции во јавноста.
Според извештајот, земјата „речиси воопшто“ нема интегриран противвоздушен и ракетен штит за заштита на територијата, а недостасува и опфатна стратегија за одбрана на Британија и нејзините прекуокеански територии како Фокландските Острови и Гибралтар.
Професорот Питер Робертс од институтот RUSI предупредил дека Британија не може да пресретне ракетни напади:
„Јавноста мора да знае – нема да можеме да ги запреме ракетите. Ќе има жртви, болници ќе бидат уништени, а храна, вода, струја и санитарни услуги ќе исчезнат“, изјавил тој.
Поранешниот началник на Генералштабот, лорд Ричард Данат, го оцени извештајот како „отрезнувачки повик за будење“, нагласувајќи дека Британија со години ги занемарува одбранбените капацитети.
Комитетот критикува дека, и покрај најавеното зголемување на буџетот за одбрана, програмите доцнат, координацијата е слаба, а армијата се соочува со недостиг од кадар и муниција. Бројот на целосно обучени војници е паднат на околу 70.000 – најмалку од Наполеоновите војни.
Извештајот доаѓа во момент на растечки тензии со Русија и Кина. Комитетот бара итна национална стратегија за одбрана и забрзани реформи, предупредувајќи дека без тоа Британија би можела да стане лесна цел во идни кризи. Владата вети дека ќе ги разгледа наодите, додека опозицијата ја обвини за бавност и неактивност.
