Македонија

Германија: Напредокот со Бугарија е клучен за ЕУ-процесот на Македонија

Германскиот министер за надворешни работи Јохан Вадефул, за време на вчерашната посета на Скопје, им порача на премиерот Христијан Мицкоски и министерот за надворешни работи Тимчо Муцунски дека напредокот во односите со Бугарија претставува неопходен услов за понатамошни успеси во пристапниот процес кон Европската Унија.

Во својата објава на Инстаграм, Вадефул истакна дека перспективата за членство во ЕУ е една од главните теми во разговорите што ги води во рамки на регионалната турнеја низ Западен Балкан.

„Германија ја поддржува Македонија на овој, не секогаш едноставен пат. Земјата веќе има постигнато многу. Сега е особено важно да се унапредат односите со Бугарија, за да може да се оствари натамошен напредок во пристапниот процес“, наведе Вадефул.

Германскиот министер додаде дека токму за ова прашање разговарал на одделни средби со Муцунски и Мицкоски, при што се осврнале и на евроинтегративниот пат, реформските процеси и поддршката што Берлин континуирано ја дава на земјите од Западен Балкан.

Претходно, Муцунски соопшти дека средбата со германскиот шеф на дипломатијата потврдува силна германска поддршка за европскиот курс на Македонија и регионалната стабилност.

По разговорите, не беше предвидена прес-конференција ниту изјава за медиумите.

Македонија

Божиновска присуствуваше на шведската прослава на светлината

Вечерва Сања Божиновска присуствуваше на традиционалниот концерт во чест на Санта Луција, кој го организираше Шведската амбасада. Празникот е симбол на светлина, топлина и надеж во најтемните нордиски ноќи.

„Секогаш е убаво кога една традиција носи порака која допира подалеку од границите – дека светлината ја создаваме самите, и дека најмногу ни е потребна токму во студените, тивки моменти од годината“, изјави Божиновска.

Таа изрази благодарност до амбасадата за прекрасната атмосфера и можноста да ја почувствува оваа уникатна шведска традиција, која најавува доаѓањето на Божиќ со радост, музика и светлина.

Македонија

Сообраќајот на Евзони повторно во прекин од 17 часот

АМСМ информира дека од 17 часот повторно е блокиран сообраќајот на Граничниот премин Евзони (ГП Богородица).

Според последните информации, сообраќајот на државните патишта се одвива непречено, по суви коловози и со умерен интензитет надвор од градските средини. На македонските гранични премини нема подолги задржувања за влез или излез од државата.

АМСМ апелира до возачите да возат со прилагодена брзина, да ја почитуваат поставената сигнализација и да бидат особено внимателни на патиштата низ котлинските и клисурните делови, каде што постои ризик од одрони. Најкритични се делниците Катланово – Велес, Маврово – Дебар – Струга, Виница – Берово и Кочани – Делчево.

Македонија

Студентите имаат уште десет дена за апликација за ваучери

Министерството за дигитална трансформација потсетува дека студентите имаат рок до 20 декември 2025 година да аплицираат за ваучери за електронски уреди.

Досега се доделени 42.606 ваучери, од кои 27.426 веќе се искористени. Во рамките на владината програма, предвидени се вкупно 55.000 ваучери за студенти на додипломски студии запишани во учебната 2025/26 година.

Ваучерите можат да се искористат најдоцна до 31 декември 2025 година.