САД бараат Зеленски да се откаже од дел од територијата и вооружувањето

САД наводно му сигнализирале на претседателот Володимир Зеленски дека Украина мора да го прифати американскиот предлог-рамка за завршување на војната со Русија, објави „Ројтерс“, повикувајќи се на два извора запознаени со ситуацијата. Според нив, предложениот план предвидува Киев да се откаже од дел од територијата и дел од вооружувањето.

Истите извори, кои побарале анонимност поради осетливоста на темата, велат дека предлогот вклучува и намалување на големината на украинските вооружени сили. Вашингтон, според нив, очекува Киев да ги прифати клучните точки од планот.

Станува збор за барања кои би претставувале значителни отстапки кон Москва. „Ројтерс“ не објави што САД му нудат на Киев во замена.

Порталот „Аксис“ претходно денеска објави дека администрацијата на Доналд Трамп тајно работи на нов план за завршување на војната во Украина, во консултација со Русија. Се работи за план од 28 точки инспириран од американскиот предлог за прекин на огнот во Газа. Како и таму, рамката би опфатила „мир во Украина, безбедносни гаранции, безбедност во Европа и идни односи меѓу САД, Русија и Украина“, наведува „Аксис“.

Специјалниот американски пратеник Стив Виткоф ја води изработката на планот и, според „Аксис“, детално го разгледувал со рускиот претставник Кирил Дмитриев. Повикувајќи се на украински функционер, медиумот пишува дека Виткоф оваа недела во Мајами разговарал за планот со Рустем Умеров, советник за безбедност на украинскиот претседател.

Американски официјален извор за „Аксис“ изјавил дека Белата куќа веќе почнала да ги информира европските функционери за предлогот. Белата куќа не одговорила на барањето на „Ројтерс“ за коментар.

Дмитриев за „Аксис“ изјавил дека основната идеја е да се земат принципите за кои Трамп и рускиот претседател Владимир Путин наводно се договориле на Алјаска во август и да се изработи предлог кој ќе го реши конфликтот во Украина, но и ќе ги нормализира односите меѓу САД и Русија и ќе ги адресира безбедносните интереси на Москва.

„Станува збор за многу поширока рамка која суштински прашува: како конечно да се обезбеди трајна безбедност во Европа, не само во Украина“, изјавил тој. Според него, целта е да се подготви писмен документ пред следната средба меѓу Трамп и Путин, чиј најавен самит во Будимпешта засега е замрзнат.

Рускиот претставник додава дека американската страна во моментов им ги објаснува „предностите“ на својот пристап на Украинците и Европејците, во услови кога Русија, како што тврди, остварува дополнителни успеси на фронтот и го зголемува своето влијание.