Градот Скопје ги претстави плановите за новогодишното украсување, кои за пречекот на 2026 година носат обемен визуелен концепт со масивни светлосни инсталации, големи 3Д фигури и проширена декорација низ централното градско подрачје. Според техничката спецификација за јавната набавка, украсувањето ќе опфати и голем број булевари и улици, со што градот најавува поимпресивен изглед отколку претходните години.
Центарот со ново празнично руво
На плоштад „Македонија“ ќе биде поставена новогодишна елка висока најмалку 13 метри, со метална конструкција, вештачко зеленило и интензивни ЛЕД украси. Поставени ќе бидат и атрактивни фото-инсталации, меѓу кои 3Д мече со димензии 4х4 метри, светлечки подароци високи до 4 метри, голема фигура во форма на Дедо Мраз од 5 метри и неколку 3Д ѕвезди високи до 4 метри. Над просторот ќе се протега и „ѕвездено небо“ од ЛЕД мразулци со површина од најмалку 800 квадратни метри.
Украсување низ главните градски артерии
Празничната атмосфера ќе се прошири на повеќе локации во централното градско подрачје. Планирани се светлосни фигури, висечки елементи и ЛЕД ефекти на следните сообраќајници:
Ул. „Даме Груев“ – 30 светлосни фигури Ул. „Димитрија Чуповски“ – 20 фигури и 20 висечки елементи Ул. „11 Октомври“ – висечки елементи и 100 ЛЕД „snowfall“ капки Бул. „ВМРО“ – 24 фигури Ул. „Филип Втори“ – 30 фигури Бул. „Гоце Делчев“ – 40 фигури Просторот пред Владата – 40 фигури Бул. „Партизански одреди“ – 12 фигури
Високи критериуми за изведувачот
Градот поставува строги услови за компанијата која ќе го реализира проектот. Потребно е во последните три години економскиот оператор да има најмалку три слични реализирани договора со вкупна вредност од најмалку 10 милиони денари, како и барем еден договор вреден 3,5 милиони денари. Со тоа се бара фирма со високо ниво на експертиза и капацитет за сложена светлосна декорација.
Годинава, Скопје најавува визуелно најбогато празнично уредување досега, со цел да создаде атмосферa што ќе го одбележи почетокот на 2026 година со раскош, светлина и празничен дух.
