Британскиот „Гардијан“ објави дека американски и руски претставници тивко изработиле план за завршување на војната во Украина, кој фактички би значел капитулација на Киев. Планот од 28 точки, за кој се смета дека е инспириран од сличен предлог развиен од администрацијата на Доналд Трамп за војната во Газа, првпат беше објавен од „Аксиос“ (Axios). Белата куќа, како што се наведува, не одговорила на барањето на „Гардијан“ за повеќе информации.
Според украинското Министерство за внатрешни работи, 25 лица – меѓу кои и три деца – биле убиени, а 73 повредени (15 деца) во денешниот руски ракетен напад врз градот Тернопол.
„Гардијан“ пишува дека нацрт-планот, изготвен од Стив Виткоф – претставник на Трамп – и Кирил Дмитриев, советник на Кремљ, предвидува крај на војната под услови што значително би го ограничиле политичкиот и воениот суверенитет на Украина. Според текстот, планот би бил доживеан како форма на предавање во Киев.
Планот предвидува Украина да се откаже од територијата што моментално ја контролира на истокот, како и да ја преполови големината на својата армија – услови што претседателот Володимир Зеленски претходно ги нарече апсолутно неприфатливи. Дополнително, би се ограничила американската воена помош и категориите на оружје достапни за украинските сили.
„Фајненшл тајмс“ и „Ројтерс“ известуваат дека за ова прашање постои неофицијален канал на комуникација меѓу Вашингтон и Москва, но не е познато дали администрацијата на Трамп формално го поддржала предлогот.
Во меѓувреме, Русија започна нов масовен напад врз западна Украина, погодувајќи станбени згради во Тернопол и енергетски објекти во Ивано-Франкивск и Лвив. Русија продолжува со систематска кампања за уништување на украинската енергетска инфраструктура пред зимата.
Украинското Министерство за енергетика објави дека во повеќе региони има прекини на електричната енергија. Зеленски изјави дека Русија испукала повеќе од 470 беспилотни летала и 47 ракети, предизвикувајќи „значајна штета“. Тој предупреди дека под урнатините во Тернопол може да има луѓе кои сè уште чекаат спасување.
Објавени видеа и фотографии покажуваат како една од погодените повеќекатници целосно се урива.
