Рускиот претседател Владимир Путин изјави дека е во „одлична здравствена состојба“ по ноќта помината во болница, каде што бил хоспитализиран за дводневен рутински лекарски преглед. „Сè беше во ред“, рече тој при посетата на една изложба во Москва.
Сепак, овој настан повторно ги разгоре долгогодишните сомнежи за неговото здравје. Во ноември, појавата на необични и неконтролирани движења на неговите нозе во Астана ја привлече вниманието на јавноста. Според експерти, вакви симптоми може да укажуваат на невролошки нарушувања, вклучително и Паркинсонова болест.
Путин во повеќе наврати бил забележан со тресење, чешање на лицето и видливо отечени црти – што некои лекари го поврзуваат со алергии, инфекции или употреба на ботокс. Извештај од 2022 година на руската истражувачка група „Проект“ тврди дека онколог специјализиран за рак на тироидната жлезда го посетувал Путин во Сочи десетици пати, што Кремљ го негира како „потполна фикција“.
Дополнителни шпекулации предизвикаа и тврдењата дека Путин користи двојници, особено по неодамнешната посета на бојното поле во Курск, каде што беше забележан човек со различен изглед и навики.
Кремљ ги отфрла сите извештаи како бесмислени, а Путин тврди дека неговото здравје е целосно стабилно.
