Центарот за управување со кризи објави итно соопштение за сериозната состојба со водостоите ширум земјата, каде поради обилните врнежи во последните 24 часа се регистрирани излевања на реки, поплавени домови и повеќе одрони на патиштата.
Во Битолскиот регион, реката Шемница се излеа кај селото Лера, поплавувајќи куќа и штали, а патот Новаци – Брод–Гнеотино е целосно прекинат поради надојдена вода од Црна Река.
Во Преспанскиот регион, реки се излеаа во Царев Двор и Дрмени, каде има поплавени домови, а постои и опасност од излевање на Голема Река.
Во Струмичкиот регион, нема пријавени штети, но има одрони на патот Струмица–Валандово.
Во Скопскиот регион, водостоите се зголемени, но засега нема излевања.
Во Велешко, има одрони и паднато дрво на два патни правци, а Вардар е на многу високо ниво со ризик да се излее кај автобуската станица.
Во Штипско, ситуацијата е стабилна.
Во Охридскиот регион, водостоите нагло се зголемени, има излевања на повеќе места и опасност од поплавување домови. Екипите интервенираат во Косел, Опеница и кај Скребатска Река.
Во Кумановско, нема излевања, а се расчистуваат наслаги кај Коинце.
Во Кратово, водостоите се високи, но без штети, а одронот на патот Страцин–Пробиштип е исчистен.
Во Тетово, водостоите растат, но нема поплави.
Од УХМР најавуваат променливо облачно време со локално обилни врнежи, грмежи и силен јужен ветер што може да достигне над 60 km/h. Температурите ќе се движат од 13 до 19 степени, а во Скопје до 17.
Најмногу дожд досега паднал во Претор (66 литри), Крушево (37), Битола (30) и Прилеп (26). Особено е загрижувачки висок водостојот на реката Сатеска.
ЦУК информира дека сите институции се известени и веќе преземаат мерки за заштита на населението и инфраструктурата. Граѓаните се повикуваат да избегнуваат движење покрај реки, мостови и поплавени делови и секоја опасност да ја пријават на бројот 112.
