Гугл објави дека Android Quick Share и Apple AirDrop отсега можат директно да соработуваат. Корисниците конечно можат да разменуваат фотографии и други датотеки меѓу iPhone и Android телефони без инсталирање дополнителни програми. Ова е првпат да постои вистинска двонасочна размена на податоци меѓу двата екосистема, а функцијата работи и на iPad и Mac уредите.
Можноста најпрво е активирана кај моделите од линијата Pixel 10 – Pixel 10, Pixel 10 Pro, Pixel 10 Pro XL и Pixel 10 Pro Fold.
Потоа, постепено треба да стане достапна и за други Android телефони, иако Гугл не откри точен датум за поширока достапност.
Брзата безжична размена функционира така што уредите се поврзуваат кога ќе се најдат во близина, а корисникот на екранот го избира фајлот што сака да го испрати. Системот автоматски препознава дали во околината има Apple или Android уред и датотеката пристигнува без кабли, сложени поставки или надворешни апликации.
