Македонија

МАКЕДОНИЈА СТАНУВА АКТИВЕН ФАКТОР НА РЕГИОНАЛНИОТ ЕНЕРГЕТСКИ ПАЗАР

Министерката за енергетика, рударство и минерални суровини Сања Божиновска оцени дека енергетскиот сектор во државата влегува во најдинамичниот период на реформи досега. На „Форумот за слобода“, меѓународен политички настан организиран од Унијата на млади сили и партнерските младински организации, таа ги презентираше реализираните проекти и идните приоритети.

Божиновска потсети дека министерството стартувало од нула, со паралелна потреба да се воспостави институционален систем, да се стабилизира состојбата и да се дефинира јасна стратегија.

„Денес можам да кажам дека Македонија по долго време има јасна енергетска насока, конкретни проекти и регионални партнери кои нè гледаат како сериозен играч“, истакна министерката, додавајќи дека енергетиката е област каде нема место за импровизации.

Меѓу досегашните резултати ги издвојува гасниот интерконектор со Грција, договорената соработка со Србија за нов интерконектор, финализираното електроенергетско поврзување со Албанија и новиот темелен Закон за енергетика. Усвоени се и закони за обновливи извори, геологија и рударство, како и за енергетска ефикасност. Забрзани се постапките за приклучување на ветерни и соларни капацитети, а подготвен е и тригодишен план за енергетски ефикасно реновирање на јавни објекти, заедно со мастер-план за идните мрежни инвестиции.

Во панел-дискусијата Божиновска нагласи дека регионалната интеграција е предуслов за стабилен енергетски систем. „Самостојност без поврзаност повеќе не значи сигурност. Само земјите кои се дел од глобалниот мрежен систем можат да бидат стабилни“, рече таа.

Министерката оцени дека Македонија го менува пристапот и регионалната позиција. Интерконекторот со Грција, како што наведе, го отвора патот кон европските пазари и нови извори на гас, додека со Србија и Албанија веќе е воспоставена рамка за функционална соработка.

Говорејќи за транзицијата од јаглен, Божиновска повтори дека затворањето на термоенергетските капацитети мора да биде внимателно планирано. Таа рече дека земјата е посветена на зелена транзиција, но без ризични и брзи потези.

„Произведуваме над 40% електрична енергија од обновливи извори, но тоа важи кога има сонце, ветер или вода. Енергија ни треба и навечер и во услови на слаба хидрологија. Интерконекторите се нашето осигурување, а паралелно инвестираме во ефикасност и обновливи извори. Секој заштеден киловат е киловат што не мора да го произведеме“, порача министерката.

Таа заклучи дека во енергетскиот сектор нема простор за драматични скокови, туку само за стабилни, прецизни и пресметани чекори кои гарантираат сигурност за граѓаните и економијата.

Македонија

Ахмети повика на протест во знак на поддршка за поранешните лидери на ОВК обвинети за воени злосторства во Хаг

Лидерот на Демократската унија за интеграција (ДУИ), Али Ахмети, соопшти дека следен протест за поддршка на поранешните команданти на ОВК, на кои им се суди во Специјализираните комори во Хаг, ќе се одржи во Скопје на 13 декември.

Според најавата, протестниот собир ќе започне во 13:00 часот на плоштадот „Скендербег“ во главниот град.

„На 13 декември, почнувајќи од 13:00 часот, ќе протестираме и во Скопје за да бараме правда и да покажеме поддршка за ослободителите кои неправедно се држат во затворите во Хаг. Планирано е протестот да се одржи на плоштадот „Скендербег“ во Скопје“, прецизираше лидерот на ДУИ.

Ахмети упати повик до Албанците да се приклучат на собирот, истакнувајќи ја целта за „демонстрирање на чистата борба за слобода и независност“.

Лидерот на ДУИ претходно учествуваше и на двата големи протести организирани во Приштина и Тирана, кои исто така беа посветени на поддршка на поранешните водачи на ОВК.

Во Судот во Хаг, на обвинителна клупа се наоѓаат и Хашим Тачи, Кадри Весели, Јакуп Красниќи и Реџеп Селими, кои се товарат за воени злосторства извршени за време и по војната на Косово.

Извор: https://politika.com.mk/archives/48700?utm_source=rss&utm_medium=rss&utm_campaign=%d0%b0%d1%85%d0%bc%d0%b5%d1%82%d0%b8-%d0%bd%d0%b0%d1%98%d0%b0%d0%b2%d0%b8-%d0%bf%d1%80%d0%be%d1%82%d0%b5%d1%81%d1%82-%d0%b7%d0%b0-%d0%bf%d0%be%d0%b4%d0%b4%d1%80%d1%88%d0%ba%d0%b0-%d0%bd%d0%b0-%d0%bf

Македонија

Екстремни врнежи на удар: До 40 литри дожд по квадратен метар – опасност од локални поплави

Денес Македонија е под директен удар на голем и моќен влажен бран кој пристигнува од југ, носејќи со себе драматична промена на времето!

Не очекува тотално облачно небо над целата земја, проследено со интензивни врнежи од дожд кои ќе ја зафатат секоја општина.

Врнежите нема да бидат само обични – се очекуваат обилни количини на вода, особено во јужните региони на земјата! Таму, метеоролозите алармираат дека на локално ниво за само 24 часа може да наврнат над 40 литри на квадратен метар, што значи дека е можна појава на локални излевања и проблеми во сообраќајот!

На повисоките места, пак, се враќа зимата! На планините, на надморска височина над 1700 до 1800 метри, дождот ќе почне да преминува во снежни врнежи, кои ќе формираат нова покривка на планинските врвови.

Властите повикуваат на максимална претпазливост, особено во југот на државата, поради очекуваниот пороен дожд!

Македонија

Секој трет граѓанин во Македонија се соочува со мито, покажува новиот извештај на МЦМС

Секоја трета личност во Македонија се соочила со барање или дала мито за да заврши административна или институционална обврска, покажува новиот извештај за корупција на Македонскиот центар за меѓународна соработка (МЦМС).

Директорот на МЦМС, Александар Кржаловски, на одбележувањето на Меѓународниот ден за борба против корупцијата изјави дека на 37% од испитаниците им било побарано мито, а 31% признале дека навистина дале мито за да ја добијат услугата што ја барале. Според него, корупцијата е втор најголем општествен проблем во земјата и, загрижувачки, „во голема мера прифатена“ во секојдневието.

Извештајот укажува на ниска доверба во правосудството – судиите и обвинителите се меѓу институциите со најниска оценка кај граѓаните, додека довербата во Парламентот е нешто повисока.

Заменик-шефот на Делегацијата на ЕУ, Бен Нупнау, порача дека Европската унија останува посветена на поддршката во борбата против корупцијата, но предупреди дека веќе три години нема значителен напредок. Тој апелираше за нов Кривичен законик, суштински реформи и деполитизација на правосудството.

Швајцарскиот и шведскиот амбасадор, Кристоф Зомер и Ола Сулстром, нагласија дека потребен е системски, долгорочен пристап за реални резултати, додека ОБСЕ порача дека промените се достижни само со активна и искрена имплементација на реформите.