Мировниот план за завршување на војната во Украина мора да го зачува украинскиот суверенитет, изјави во петокот американскиот потпретседател Џеј Ди Венс.
Американскиот претседател Доналд Трамп му даде рок на Киев до четврток да одговори на најновиот мировен предлог, кој силно ги изненади европските земји.
Според американскиот план, од Украина се бараат сериозни отстапки – повлекување од делови од источна Украина кои сè уште не се под руска контрола, намалување на вооружените сили и откажување од членство во НАТО.
Венс на мрежата Икс порача дека секој мировен договор мора да го запре убивањето и истовремено да го зачува украинскиот суверенитет, но и да биде прифатлив и за Русија и за Украина. Тој додаде дека планот мора да ја минимизира можноста конфликтот повторно да избие.
„Секоја критика на мировната рамка произлегува од погрешно разбирање или погрешно претставување на реалноста на терен“, напиша Венс. „Според некои фантазии, доколку дадеме повеќе пари, оружје или санкции, победата би била на прагот. Мирот нема да го донесат пропаднати дипломати или политичари што живеат во свет на бајки, туку паметни луѓе што живеат во реалниот свет.“
Планот на Трамп му беше презентиран на украинскиот претседател Володимир Зеленски во четвртокот.
Зеленски претходно предупреди дека државата е пред „многу тежок избор: или да го загуби достоинството или да ризикува да го изгуби клучниот партнер“ – мислејќи на САД.
Рускиот претседател Владимир Путин позитивно реагираше на предлогот, истакнувајќи дека документот од 28 точки би можел да биде „основа за конечен мировен договор“.
Во меѓувреме, германскиот канцелар Фридрих Мерц и други европски лидери ќе одржат итни разговори на маргините на самитот Г20 во Јоханесбург за можниот заеднички одговор. На средбата се очекуваат и лидерите на Франција, Италија и Обединетото Кралство, како и претседателката на Европската комисија, Урсула фон дер Лајен.
