САД сериозно размислуваат да ја ограничат или целосно да ја прекинат клучната разузнавачка и воена поддршка за Украина доколку Киев го одбие мировниот план на претседателот Доналд Трамп, објави „Волстрит журнал“. Според изданието, Трамп ѝ дал на Украина рок од една недела да соопшти дали го прифаќа американскиот предлог, што во Киев и кај западните сојузници е сфатено како најсилен сигнал досега дека соработката би можела драматично да се влоши.
Анализата наведува дека и Украина и партнерите на Запад стравуваат дека, доколку планот биде одбиен, разузнавачките канали и испораките на оружје може да бидат стопирани. Американскиот претседател претходно порача дека Володимир Зеленски мора да го прифати предлогот како основа за политички договор со Москва.
На 20 ноември, украинскиот пратеник Олексиј Гончаренко го објави документот од 28 точки што ја дефинира рамката на мировниот план. Иако официјални извори во Киев за „Фајненшл тајмс“ признаваат дека предлогот во сегашната форма е неприфатлив, очекувањата во Вашингтон се дека Зеленски ќе ги стави потписите до 27 ноември.
Планот предвидува Украина да се откаже од стремежот кон членство во НАТО, да се одредат нови граници, да се формира тампон-зона, да се ограничат капацитетите на украинската армија и да се користат замрзнатите руски средства за идни договори.
Зеленски неодамна предупреди дека постои реална опасност од засилен меѓународен притисок во претстојните мировни преговори и порача дека Киев нема да прифати решение што би ги поткопало националните интереси на Украина.
