Мнозинството жители на Берлин се против кандидатурата на градот за домаќин на Олимписките игри, покажува анкетата спроведена од дневниот весник „Тагешпигел“. Според резултатите, 67% од испитаниците се против плановите за Летните игри во 2036, 2040 или 2044 година, додека 27% ја поддржаа кандидатурата, а 6% беа неодлучни.
Германската конфедерација на олимписки спортови (DOSB) планира во третиот квартал од 2026 година да одлучи кој град или регион ќе се кандидира и за кои Игри. Во конкуренција се Берлин, Хамбург, Минхен и регионот Рајна-Рур. Жителите на Минхен веќе ја поддржаа кандидатурата, додека Северна Рајна-Вестфалија ќе одржи референдум на 19 април за продолжување на процесот во регионот Рајна-Рур.
И покрај резултатите од анкетата, планерите на Олимписките игри во Берлин остануваат оптимисти. „Феномен е што во Берлин сè секогаш се дискутира детално, но на крајот се појавуваат динамика и голем ентузијазам“, изјави претставникот Каве Нироманд.
Претседателот на Берлинскиот државен спортски сојуз, Томас Хертел, додаде дека другите анкети покажуваат повисоко ниво на поддршка, но призна дека резултатите од „Тагешпигел“ укажуваат на предизвик во јавното мислење. Нироманд најави активности за подобрување на атмосферата во градот, кои ќе се спроведат во септември 2026 година пред конечната одлука на DOSB.
Германија досега била домаќин на Летните олимписки игри во Берлин (1936) и Минхен (1972), како и на Зимските игри во Гармиш-Партенкирхен (1936), но неколку подоцнежни кандидатури пропаднале или беа стопирани со референдуми.
