Украина од почетокот на инвазијата потрошила меѓу 400 и 500 милијарди евра за одбрана, според проценки врз основа на достапни државни податоци. Само официјално евидентираната воена потрошувачка, според SIPRI, изнесува околу 65 милијарди евра годишно, без вредноста на оружјето што го донираат сојузниците.
Со вклучена опрема од партнерите, воените расходи за 2024 година надминале 125 милијарди евра. Украина ја финансира одбраната преку буџетски средства, меѓународна воена и финансиска помош, домашната индустрија и воени обврзници, а најголем дел од парите одат за плати, муниција, поправки, дронови и производство на оружје.
САД се најголем донатор со одобрени 182,8 милијарди долари, од кои 67 милијарди се воена помош. Европските земји досега обезбедија околу 72 милијарди евра. Се проценува дека Украина од сопствени средства потрошила 100–120 милијарди долари, главно за наоружување, логистика, инфраструктура, енергија и снабдување на армијата.
Според ММФ, Украина дневно троши 172 милиони евра, а меѓународната поддршка засега овозможува стабилно финансирање. Светската банка проценува дека за обнова на земјата во следните 10 години ќе бидат потребни 524 милијарди долари, со три можни сценарија – оптимистичко, песимистичко и реално – кои зависат од траењето на војната и динамиката на странската помош.
