САД и Украина изработија дополнет и приспособен мировен план за завршување на војната со Русија, се наведува во заедничката изјава на двете држави по преговорите одржани во Женева, на кои присуствуваа и претставници од Европа.
Изгледа дека документот е надграден врз основа на претходниот план подготвен од американската администрација, кој Киев и неговите сојузници го оценија како премногу поволен за Москва, пренесува „Ројтерс“.
Во заедничката изјава по разговорите во Женева, американската и украинската делегација наведоа дека воделе „исклучително продуктивни“ преговори, кои ќе продолжат и наредните денови. Не ги откриваат деталите околу спорните прашања што остануваат нерешени, вклучувајќи ја и темата за безбедносни гаранции за Киев.
Белата куќа во одделно соопштение наведе дека новата верзија на мировниот план содржи посилни безбедносни гаранции и дека украинската страна оценила оти планот „ги одразува нивните национални интереси“. Украинските претставници не дадоа посебна изјава и не ги коментираа наводите, јавува „Ројтерс“.
Американскиот државен секретар Марко Рубио, кој ги предводеше разговорите, во неделата изјави дека е „многу оптимистичен“ во однос на брзо постигнување договор за Украина.
Рубио истакна дека е постигнат значителен напредок, но дека конечниот договор мора да го потврдат претседателите на двете држави и дека сè уште постојат неколку отворени точки за кои треба да се работи.
Тој додаде дека американските и украинските преговарачи продолжуваат со работата и денес, напоменувајќи дека разговорите траат веќе три недели, но дека во последните четири дена значително се забрзале.
Зеленски и Трамп во Белата куќа?
Според информации на два извора, американски и украински претставници разговараат за можна посета на претседателот Зеленски на Вашингтон веќе оваа недела, за да разговара со претседателот Трамп за мировниот план. Засега нема потврден датум.
Еден од изворите наведува дека целта на средбата би била да се разгледаат најосетливите точки од американскиот предлог, вклучително и прашањето за територијата.
Да потсетиме, американскиот план предвидуваше де факто предавање на целиот Донецк на Русија, додека Киев досега инсистираше на примирје според актуелната линија на фронтот.
Европски противпредлог
Вчера во јавноста се појави и европскиот противпредлог на американскиот план, кој клучно се разликува во делот на територијалните решенија. Русија сигнализираше дека би го прифатила планот доколку украинските сили се повлечат од целиот Донбас – што е неприфатливо за Украина и ЕУ.
Европскиот предлог предвидува и НАТО да не распоредува трајни сили во Украина во мирнодопски услови. Украинската армија во мир би била ограничена на максимум 800.000 војници, додека американскиот план предложи горна граница од 600.000.
Европа бара и Украина да биде финансиски обесштетена, со можност да се користи руската замрзната имотна маса сè додека Москва не ја надомести причинетата штета.
Во предлогот стои и дека Украина нема со воени средства да ги враќа своите „окупирани суверени територии“, туку ќе преговара за нивна размена, при што почетна точка ќе бидат постојните линии на раздвојување. Предвидено е и што е можно поскоро организирање избори во Украина по потпишувањето на мировниот договор.
