Белиот лук тивко врие во огромни метални казани на отворен оган, додека готвачите додаваат конзервиран домат, пиперки и зачини.
Она што се подготвува во заедничката кујна во Ал-Завајда, во централна Газа, не е само оброк, туку спас за илјадници луѓе.
Американската хуманитарна организација Anera ја отвори оваа кујна по започнувањето на примирјето пред шест недели, а управува со уште една кујна во Ал-Маваси на југот на појасот. Секој ден Anera обезбедува топол оброк за повеќе од 20.000 луѓе, а според раководителот на тимот, Сами Матер, бројот на семејства што добиваат помош се зголемил од 900 на повеќе од 4.000 во последните шест месеци, пренесува BBC.
„Порано користевме 15 казани, а сега сме на 120 дневно, покривајќи над 30 кампови со внатрешно раселени лица“, вели Матер.
Пристапот до храна е клучен проблем уште од почетокот на војната во октомври 2023 година, бидејќи Израел строго ја ограничува количината помош што може да влезе во Газа. Глад беше официјално потврден во август, а Обединетите нации предупредуваат дека може да се прошири и во други делови од појасот.
На менито најчесто има ориз, тестенини и леќа, со зеленчук како пиперки, кромид и компир.
„Ни треба поразновидна храна – свеж зеленчук и основни протеини како месо и пилешко, но тие не се дозволени да влезат како хуманитарна помош“, нагласува Матер.
Од почетокот на примирјето, Anera само еднаш успеала да послужи оброк со месо, и тоа од конзерви. Организацијата додава дека кујните се соочуваат и со недостиг од прибор, амбалажа и боци гас за почисто готвење.
Според ООН, во последната недела вкупниот број на поделени оброци во Газа, преку мрежата на различни хуманитарни кујни, достигнал 1,4 милиони дневно, во споредба со помалку од еден милион пред еден месец. Населението на појасот надминува два милиони жители.
„Живееме од заедничката кујна. Ни носат храна, вода и леб, кој го добиваме можеби еднаш неделно“, вели Аида Салха од Газа, мајка на шест деца која живее во шатор со роднини.
Хуманитарните агенции бараат Израел да ги отвори сите пет премини кон Газа – моментално функционираат само три – и да ги ублажи рестрикциите за работа на организациите, кои се соочуваат со административни пречки.
Светската програма за храна (WFP) соопштува дека една четвртина од домаќинствата во Газа јадат само еден оброк дневно, а цените на основните намирници и понатаму се далеку повисоки од пред војната.
„Ми загина синот, куќата и имотот ми се уништени. Секој ден живееме во катастрофални услови“, вели Абдул Карим Абдул Хади од Џабалија, татко на седум деца кој добива помош од Anera.
