Северна и Јужна Кореја се наоѓаат во „многу опасна ситуација“ каде случаен судир е можен во секој момент, а клучно е Сеул да го вклучи Пјонгјанг во дијалог, изјави во понеделник јужнокорејскиот претседател Ли Џе Миунг, пренесува агенцијата Јонхап. Северна Кореја одбива да одговори на повиците на Сеул за контакт и поставува бодликава жица долж воената граница, што не било направено од крајот на Корејската војна (1950-1953).
„Меѓукорејските односи станале многу непријателски и конфронтациски, а поради недостаток на основно ниво на доверба, Северот покажува многу екстремно однесување“, рече Ли. Јужна Кореја на 17 ноември предложи воени разговори со Северна Кореја за воспоставување јасна граница долж Воената демаркациска линија (MDL) за да се спречат вооружени инциденти, но Северна Кореја не одговори.
Оваа година имаше повеќе од десет упади на севернокорејски војници на границата, при што јужнокорејските трупи испукале предупредувачки оган според протоколот. Ли додаде дека постигнувањето мир со Северна Кореја ќе биде долгорочен процес, но откако ќе се воспостави стабилен мир, „подобро би било“ Јужна Кореја и САД да ги прекинат заедничките воени вежби. Пјонгјанг ги осуди овие вежби, нарекувајќи ги генерална проба за нуклеарна војна против него. Околу 28.500 американски војници и вооружени системи се стационирани во Јужна Кореја, пренесува Ројтерс.
