Прилеп, градот познат по „жолтото злато“, има уште едно богатство со светска слава – мермерот од наоѓалиштето „Сивец“. Овој млечнобел камен, еден од најквалитетните мермери во светот, со децении се извезува во Јапонија, САД, Австралија, Африка и низ цела Европа, а денес ги разубавува некои од најпрестижните згради во светот, меѓу кои Белата куќа, палатите на Версаче и Коко Шанел во Токио, како и резиденции во Ангола, Египет и Саудиска Арабија.
Наоѓалиштето „Сивец“ е уникатна природна појава – комплекс од блескаво бели мермерни коридори високи и до 60 метри, каде работниците, со дијамантски пили и најмодерна италијанска технологија, ги сечат огромните блокови тешки по 20–30 тони. Од стотина кубици маса, извираат едвај пет кубици „здрав“ мермер, што ја зголемува и неговата вредност. Најбаран е чистобелиот, најреткиот прилепски мермер, чија цена и побарувачка со години растат.
Од овој камен се создадени безброј споменици, фасади и уметнички дела дома и во светот. Скулпторите како Томе Серафимовски, Бранко Конески, Драган Поповски – Дада и покојниот Димо Тодоровски, создавале ремек-дела од прилепскиот мермер, а странски уметници редовно го користат за интернационални проекти.
Мермерот од Прилеп има длабока историска трага. Според археолозите, со него граделе античките цивилизации – Асирци, Египќани, Римјани, Византијци. Во археолошките локалитети како Стоби, Хераклеја и Скупи се пронајдени скулптури токму од прилепски мермер, а германскиот археолог Хајнрих Шлиман во својата книга „Троја“ истакнува дека во древната Троја биле најдени градби направени од мермерот од овој регион.
Покрај мермерот, прилепските мермерни басени кријат и друго богатство – рубини и полускапоцени камења како микролин, опал, гранат и гдијаспор. Иако Македонија го има единственото европско наоѓалиште на рубини, скапоцените камења често се продаваат за смешни цени, па дури завршуваат на црната берза, а потоа и во светски каталози како ценети скапоцености.
Прилепчани велат дека „половина Багдад е изграден со нивниот мермер“, а мермерни плочи од „Сивец“ денес ги украсуваат музеи во Лондон, аеродроми во Словенија и бројни европски банки. Иако мек за надворешни услови, за внатрешна декорација прилепскиот мермер е незаменлив – материјал што со векови опстојува и го носи белегот на една од најстарите каменоресечки традиции во светот.
