Имињата на новите министри од редовите на коалицискиот партнер ВРЕДИ ќе бидат познати до утре, а предлогот во текот на неделата ќе биде доставен до Собранието, соопшти премиерот Христијан Мицкоски на прес-конференција по доделувањето решенија за самовработување во рамките на Оперативниот план за вработување.
Тој истакна дека процесот е при крај и дека Владата ги финализира сите детали.
„До утрешниот ден ќе се финализираат сите работи, очекувам оваа недела да ги доставам до Парламентот. Кога ќе биде сѐ конечно, јавноста ќе ги знае имињата,“ изјави Мицкоски.
Во однос на тоа кога ќе бидат објавени имињата на поверениците во општините каде што не беа избрани градоначалници, премиерот кратко одговори дека јавноста ќе биде информирана уште денес.
„Нека поминат на владина седница. За кратко почнува седницата и јавноста ќе ги дознае за неколку часа,“ додаде тој.
