Германската авиокомпанија „Луфтханза“ се извини за сериозниот пропуст поради кој премиерите на Финска, Данска и Луксембург, како и високата претставничка на ЕУ за надворешна политика Каја Калас, не успеаја навреме да стигнат на самитот на ЕУ и Африканската унија во Луанда.
Инцидентот се случил во неделата вечерта, кога лидерите чекале на пистата во Франкфурт, подготвени за патување кон Ангола, но нивниот авион не можел да полета поради техничка грешка во информативниот систем за патници. Поради проблемот, летот LH560 се одложил цели 13 часа и 25 минути.
Финскиот премиер Петери Орпо сепак успеал да пристигне во Луанда, но со значително доцнење. Данската премиерка Мете Фредериксен, премиерот на Луксембург Лук Фриден и Каја Калас биле принудени целосно да ги откажат патувањата и да останат во Европа.
Портпаролот на „Луфтханза“, Борис Огурски, ја потврди информацијата за „ЕурАктив“ и изрази жалење за непријатностите. Тој додаде дека компанијата не може да открива имиња на патници поради заштита на лични податоци. Иако била разгледувана можноста за заменски авион, ноќната забрана за летови што стапува во сила по 23 часот ја оневозможила таа опција.
