По неколкунеделни интензивни преговори, коалицијата ВРЕДИ ја финализирала листата на кадри што ќе ѝ ја предложи на премиерот Христијан Мицкоски за пополнување на празните позиции во Владата. Според извори од партијата, кадровските решенија се усогласени и се чека потврда од Мицкоски.
Според договорот, Беким Сали е предвиден за прв вицепремиер и министер за евроинтеграции. Мухамед Хоџа ќе го преземе ресорот животна средина, додека Башким Бакиу е номиниран за нов министер за здравство на местото на Азир Алиу.
Алиу, пак, по заминувањето од Министерството за здравство, треба да ја преземе функцијата директор на Агенцијата за електронски комуникации. Дополнително, Орхан Муртезани е номиниран за амбасадор на Република Северна Македонија во Брисел.
Овие промени се иницирани по изборот на Изет Меџити за градоначалник на Чаир, по што неговите претходни функции останаа празни. Доколку премиерот го одобри предлогот, очекувањата се дека до крајот на неделата документите ќе бидат доставени до Собранието и ќе започне постапката за избор на новите министри.
