Економија

Wolt во Македонија – како глобалната апликација ја менува навиката за нарачување

„Во првиот ден и првата недела од лансирањето на апликацијата за достава во Скопје, Wolt забележа најмногу нарачки на платформата, гледано глобално, повеќе од кој било град во светот откако компанијата работи“, вели Ѓорѓе Давидовиќ, извршен директор на Wolt Македонија и Србија.

(Скопје, 26 ноември 2025) – Wolt, омилената апликација за достава во Македонија ги анализираше стотиците илјади нарачки направени во Скопје годинава, кои покажуваат дека граѓаните не ја користат апликацијата за достава само за скара и за омилени брзи оброци, туку сè почесто и за секојдневни намирници. Според анализата на најновите бројки за трендот на нарачки во градот, скопјани „живеат“ на ќебапи и помфрит, ги обожаваат локалните бургери и сендвичи, а сè почесто за дома нарачуваат и основни намирници како вода, млеко и масло за јадење. Сегментот здрава храна е видлив и со тенденција на раст.

„Во првиот ден и првата недела од лансирањето на апликацијата во Скопје, Wolt забележа најмногу нарачки на платформата, гледано глобално, што значи повеќе од кој било град во светот откако компанијата работи. Скопје е еден од градовите каде што локалната гастрономија многу природно се префрлува во дигиталниот свет. Од семејните ќебапчилници до модерните ‘fitness’ кујни, партнерите на Wolt го претвораат она што луѓето одамна го сакаат офлајн во практично, онлајн искуство,“ вели Ѓорѓе Давидовиќ, извршен директор на Wolt Македонија и Србија.

Анализата се однесува на периодот од 1 април, кога Wolt официјално започна со работа во Македонија, до 20 ноември 2025 година и опфаќа над стотици партнери на платформата. Повеќето нарачки се од ресторани, потоа од продавници за намирници и уште еден мал дел од останатите трговци, иако аквизицијата на нови партнери е брза, изборот е се подобар и потенцијалот за раст е голем. Ова потврдува дека топлата храна и натаму е главната причина поради која скопјани користат апликации за достава, додека брзата достава на намирници веќе станува значаен втор сегмент.

Скара-културата во Скопје се сели онлајн

На врвот на листата на најчести достави е ќебапот, како најпопуларна порција. Високо на листата се и класичните прилози помфрит во различни големини, свински гиро-пити и такоси, сите се наоѓаат меѓу првите десет артикли.

Категоријата „Скара“ е најголема на платформата според обем, а веднаш зад неа следуваат додатоците, враповите, помфритот и бургерите. Ова ја одразува силната позиција на традиционалната балканска скара и модерната брза храна во урбаната исхрана на Скопје.

На врвот се истакнуваат локални „херои“ како Venice Fontana, Baking Bread – Rekord, Fontana Kebapcilnica Kisela Voda (Original), Munchies burger и Bon Tacos.

Од бургери до нутритивно балансирани оброци – расте апетитот за поздрави опции

Покрај омилената утешителна храна податоците на Wolt го покажуваат и растот на концептите со храна кои нудат балансирани оброци. Меѓу објектите со најголем обем на нарачки е и Fitness House, кои нудат салати, протеински оброци и нутритивно избалансирани оброци за скопјани кои сакаат поздрав ручек или вечера.

Овој растечки сегмент се вклопува во пошироките трендови на е-трговијата во Македонија, каде што потрошувачите сè повеќе ги прифаќаат дигиталните канали не само за уживање, туку и за секојдневни потреби и производи за благосостојба.

Мали набавки во последен момент: вода, млеко и газиран сок за 30 минути

На македонскиот пазар Wolt, покрај понудата на храна од ресторани, веднаш почна и со понуда од продавници кои нудат намирници. Иако во Скопје рестораните доминираат со нарачките преку Wolt, доставата на намирници од локалните продавници е во постојан раст. Најнарачувани артикли се флаширана вода од 1,5 литар, млеко, газиран сок и сончогледово масло – градивните елементи на секојдневната домашна рутина.

Партнери како Bumerang Tobacco, маркетите Reptil и La Noi Market се издвојуваат како клучни играчи во овој сегмент, помагајќи им на жителите на Скопје да го дополнат фрижидерот и шпајзот без да излезат од дома.

„Она што јасно го гледаме во податоците е следново: луѓето веќе се чувствуваат удобно да нарачуваат храна преку Wolt, а сега сè почесто додаваат и основни намирници. Нашата цел е да биде подеднакво лесно да ги добиете и ќебапите, и млекото, и 1,5-литарската вода – во истата апликација,“ додава Ѓорѓе Давидовиќ.

Пазар со простор за раст

Во последните години во Македонија е-трговијата брзо расте, поддржана од поголемата интернет-покриеност и популарноста на меѓународните платформи, со значителен дел од онлајн-нарачките што одат кон странски веб-страници.

Во овој контекст, податоците на Wolt од Скопје покажуваат како локалните и регионалните играчи можат да изградат силни, локално релевантни дигитални услуги, засновани на тоа што луѓето навистина го јадат и купуваат секој ден.

Во Македонија Wolt расте со јасна цел да понуди квалитет, да изгради стабилна основа во Скопје преку проширување на мрежата на ресторани, продавници, курири и унапредување на операциите. Следен чекор е да се прошири и во други градови, каде е препознаен силен локален интерес. Првите резултати за користењето на услугата Wolt+ се одлични и покажуваат дека корисниците заштедуваат, нарачуваат почесто и откриваат нови места, што за трговците носи дополнителен раст. Партнерството со Телеком МК, овозможува на корисниците на Magenta Moments 12 месеци бесплатно да ја користат услугата Wolt+, со што уште еднаш се потврдува дека моделите на претплата добро функционираат на локалниот пазар. Wolt тестира и опција за плаќање во готово, која наскоро ќе биде достапна со цел чекор по чекор да ја изгради најдоверливата платформа за „сè доставено“ во земјата.

„Ова е само почеток,“ вели Ѓорѓе Давидовиќ. „Скопје има богата култура на храна и дигитално писмена популација. Возбудени сме што продолжуваме да градиме платформа која го одразува и едното и другото, заедно со нашите трговски партнери и доставувачи-партнери.“

За Wolt

Wolt е технолошка компанија со седиште во Хелсинки, чија мисија е да донесе радост, едноставност и можности за заработка во секојдневието на локалните заедници. Wolt развива платформа за локална трговија која ги поврзува луѓето што сакаат да нарачаат храна, намирници и други производи со луѓе и бизниси што се подготвени да ги продаваат и доставуваат.

Компанијата е основана во 2014 година и во 2022 година ѝ се придружи на DoorDash (NASDAQ: DASH). Во 2025 година, DoorDash ја стекна и Deliveroo, дополнително проширувајќи го своето глобално присуство. Денес, заедно оперираме во повеќе од 30 земји.

Економија

ВЛЕН: Економскиот раст ја покажува ефективноста на работата на министерот Бесар Дурмиши

ВЛЕН ја поздравува објавената стапка на раст на Бруто домашниот производ од 3,8 проценти во третото тримесечје, соопштена од Државниот завод за статистика, оценувајќи дека овој резултат е јасен показател дека економијата се консолидира и се движи во вистинска насока.

Според партијата, ваквиот раст ја позиционира државата меѓу економиите со солидни перформанси и ги одразува позитивните ефекти од политиките насочени кон економска стабилност, привлекување инвестиции и создавање нови можности за вработување.

ВЛЕН посочува дека постигнатите резултати се тесно поврзани со работата на Министерството за економија и труд под раководство на министерот Бесар Дурмиши, кој од првиот ден се фокусирал на подобрување на условите за бизнис-заедницата и стимулирање на инвестициите. Овие чекори, велат од партијата, веќе даваат резултати преку отворање нови работни места и постепено зајакнување на економијата.

„Растот го покажува променетиот пристап. ВЛЕН ќе осигури оваа промена да продолжи да се продлабочува секој ден“, стои во партиското соопштение.

Економија

Унгарската МОЛ со амбиции да преземе дел од „Лукоил“

Унгарската енергетска компанија МОЛ изразила интерес за купување на дел од меѓународните средства на санкционираниот руски нафтен гигант „Лукоил“, пренесува Ројтерс, повикувајќи се на три извори запознаени со разговорите. Со тоа, МОЛ се приклучува на сè поголемиот круг потенцијални купувачи заинтересирани за имотот на „Лукоил“ во странство.

Санкциите што САД ги воведоа во октомври врз најголемиот приватен руски производител на нафта имаат за цел да извршат притисок врз Москва да ја прекине војната во Украина. Како резултат, „Лукоил“ беше принуден да стави на продажба значаен дел од своите странски операции, а моментално преговара со „Ексон Мобил“, „Шеврон“ и инвеститори од Блискиот Исток. Вашингтон претходно ја одби швајцарската компанија Гунвор како можен купувач.

Странските средства на „Лукоил“ со седиште во Виена опфаќаат рафинерии во Европа, удели во нафтени полиња во Казахстан, Узбекистан, Ирак и Мексико, како и широка мрежа бензински пумпи ширум светот. Според еден од изворите на Ројтерс, МОЛ е заинтересирана за европските рафинерии и продажната мрежа на „Лукоил“, како и за удели во капацитетите за производство во Казахстан и Азербејџан.

Американското Министерство за финансии одбило да даде коментар, а МОЛ и Белата куќа не одговориле на новинарските прашања.

Унгарија значително се потпира на руската енергија, а премиерот Виктор Орбан, кој е 15 години на власт, настојува да одржува балансирани односи со Москва и Вашингтон. Ројтерс потсетува дека МОЛ е заинтересирана и за купување на српската рафинерија НИС, која исто така е под американски санкции и се наоѓа под руска контрола.

Економија

Глобалните трошоци за храна продолжуваат да се намалуваат и во ноември

Цените на храната на светските пазари продолжија да паѓаат и во ноември, трет месец по ред, при што најголем пад е забележан кај млекото, млечните производи и растителните масла, соопшти агенцијата за храна и земјоделство на ОН (ФАО).

Според новите податоци на ФАО, во октомври цените се намалија за 1,6 проценти на месечно ниво, додека во ноември индексот на цените на кошничката основни прехранбени производи изнесувал 125,1 поени, што е за 1,2 проценти пониско од октомвриското ниво.

Индексот покажува дека глобалните цени на основните прехранбени производи се пониски за 2,1 процент споредено со истиот период лани, јавува Хина.

Најголемо намалување е забележано кај шеќерот – пад од 5,9 проценти во однос на октомври, како резултат на очекуваната силна понуда и високо производство во Бразил, Индија и Тајланд.

Цените на млекото и млечните производи се намалени за 3,1 процент, пред сè поради падот кај путерот и полномасното млеко во прав, поддржан од зголемено производство и изобилство на понуда во главните светски региони.

Растителните масла поевтинија за 2,6 проценти, при што особено се издвојува сончогледовото масло, чии цени паднале поради подобрената понуда од регионот на Црното Море.

Месото е поевтино за 0,8 проценти, што се должи на пониските цени на живинското месо поради изобилна понуда и засилена глобална конкуренција. Пад е забележан и кај свинското месо, како резултат на слаба побарувачка во Европската Унија и кинеските тарифи кои го ограничуваат увозот.

За разлика од другите категории, цените на житарките пораснаа за 1,3 проценти во споредба со октомври. Цената на пченицата скокна за 2,5 проценти поради стравувањата дека конфликтите во регионот на Црното Море би можеле да го нарушат снабдувањето и да ги намалат засадените површини во Русија.