Украинскиот претседател Володимир Зеленски денеска разговараше со претседателката на Европската комисија, Урсула фон дер Лајен, информирајќи за средбата преку социјалната мрежа X. Тој и се заблагодари за, како што ја нарече, нејзината јасна поддршка за Украина, која Фон дер Лајен ја претстави во својот говор во Европскиот парламент.
Зеленски нагласи дека Европската унија и Украина имаат усогласен став: санкциите против Русија мора да бидат дополнително заострени сѐ додека Москва „ги отфрла сите мировни напори“. Истовремено, тој истакна дека е неопходно да продолжи и одбранбената и финансиската поддршка за Украина.
Една од клучните теми било прашањето за замрзнатите руски средства, чиј значителен дел се наоѓа во земји-членки на ЕУ. Според Зеленски, во тек се интензивни разговори за можноста овие средства да се искористат за финансирање на украинската одбрана.
„Разговаравме и за актуелната дипломатска ситуација и за чекорите што ги презема Европската унија за донесување одлука за употреба на замрзнатите руски средства“, изјави Зеленски по средбата.
