32-годишната инфлуенсерка Стефани Пипер од Грац исчезна под мистериозни околности, а истрагата веќе добива драматичен пресврт. По апсењето на нејзиното повремено момче во Словенија, притворени се и неговиот брат и очув – што дополнително ги продлабочува стравувањата од трагичен исход, пишува Krone.
Стефани последен пат била видена во неделата наутро, откако се вратила од божиќна забава околу 7 часот и испратила порака дека стигнала дома. Требало да се појави на фотосесија во центарот на Грац, но никогаш не дошла. Нејзиното исчезнување било пријавено истиот ден навечер.
Само еден ден подоцна, во граничната зона меѓу Штаерска и Словенија, бил уапсен 31-годишниот Петер М., нејзиното поранешно момче, со кое имала долга, но нестабилна врска. Сомнежите нагло се зголемиле кога неговиот црвен „голф“ бил пронајден изгорен на паркингот на казиното Монд, недалеку од граничниот премин Шпилје – можен обид да се сокријат траги.
Словенечката полиција претресла куќи и пошироки шумски подрачја во близина на границата, а Петер М. во моментов е во притвор, додека се разгледува неговата екстрадиција во Австрија.
Шокот уште повеќе пораснал кога портпаролот на обвинителството во Грац, Арнулф Румполд, потврдил дека уапсени се и братот и очувот на осомничениот. И тие се поврзуваат со можното исчезнување на младата жена.
Во меѓувреме, сосед на Стефани изјавил дека го видел Петер М. на скалите во нејзината зграда токму околу времето кога исчезнала – што дополнително ја потхранува претпоставката дека ја чекал во заседа.
Потрагата продолжува, а јавноста со внимание го следи секој нов детал од случајот кој ја потресе Австрија.
