Рускиот суд денес осуди осум мажи на доживотна казна затвор поради нивната вмешаност во голема експлозија во 2022 година која делумно го уништи важниот мост што ја поврзува Русија со Кримскиот полуостров, анектиран во 2014 година.
По сослушувањето во Ростов на Дон во јужна Русија, сите беа прогласени за виновни за припадност на „организирана криминална група“ чија цел била „реализирање на нападот“ на Кримскиот мост, при што во октомври 2022 година загинаа пет лица, соопшти регионалниот воен суд.
За експлозијата, која се случи осум месеци по почетокот на големата руска офанзива на Украина, подоцна одговорност презеде Киев.
Симболично значење на мостот
Мостот долг 19 километри, кој беше отворен во 2018 година од рускиот претседател Владимир Путин, за руската влада е еден од симболите на анексијата на украинскиот Крим во 2014 година.
Неколку делови од овој патен и железнички мост, кои меѓутоа беа поправени, делумно се урнаа на 8 октомври 2022 година, кога камион натоварен со експлозив експлодира на една од сообраќајните ленти. Силната експлозија предизвика пожар на осум цистерни со нафтени деривати и уништи два дела од бетонскиот патен мост.
Во нападот загинаа пет лица, меѓу кои и возачот на камионот во кој експлозивот бил натоварен без неговo знаење, стои во соопштението на судот.
Стратешко значење на мостот
Осуммина обвинети ја негираат вината, а судењето се одвиваше од февруари зад затворени врати.
Мостот повторно беше оштетен во јули 2023 година во напад со морнарички дронови, за што повторно одговорност презеде Киев.
Од тогаш, руските власти значително го засилија надзорот над мостот, кој е клучен за испраќање на трупи и воена опрема на анексираниот Крим.
