Дванаесет високи германски офицери изработиле таен оперативен план кој би се активирал во случај на директен воен судир меѓу НАТО и Русија, објави „Волстрит џурнал“ (WSJ). Работата на документот започнала пред околу две и пол години, а германските власти досега не го коментираа неговото постоење.
Планот, опфатен во документ од 1.200 страници, детално опишува како 800.000 војници од Германија, САД и други сојузнички држави би биле префрлени кон источниот фронт. Во него се наведени пристаништата, железничките линии, реките и патиштата што би се користеле за транспорт, како и логистичката поддршка и мерките за заштита на трупите.
Според WSJ, анализите на германските служби покажуваат дека Русија би можела да биде подготвена за напад врз НАТО до 2029 година. Но, серијата на последни шпионски активности, саботажи и нарушувања на европскиот воздушен простор создаваат сомнеж дека Москва можеби планира порано дејствување.
Во дел од проценките се наведува и дека евентуален прекин на огнот во Украина би ѝ овозможил на Русија да ги насочи своите воени ресурси кон потенцијални цели во Европа.
Од НАТО досега нема официјална реакција на обелоденетите информации.
