На 28 ноември Националното биро за борба против корупција (НАБУ) соопшти дека врши претреси во домот и канцеларијата на Андриј Ермак, шефот на кабинетот на украинскиот претседател Володимир Зеленски.
Ермак е под истрага во корупциски случај поврзан со државниот нуклеарен монопол Енергоатом – истрага што се смета за најголема во мандатот на Зеленски. Осум лица се веќе обвинети, а како главен организатор се посочува Тимур Миндиќ, близок соработник на претседателот.
„НАБУ и САПО денес вршат процесни дејства во мојот дом. Истражителите немаат никакви пречки, добија целосен пристап, а моите адвокати соработуваат со нив,“ напиша Ермак на Телеграм.
Според украинските медиуми, претреси се вршат и во неговата канцеларија на Банкова улица во Киев. Во истрагата се споменува дека една луксузна куќа финансирана преку корупциската шема на Енергоатом наводно била наменета за Ермак.
Медиумот Украинска Правда претходно објави дека истражителите го нарекуваат Ермак со кодното име „Али Баба“, а главниот антикорупциски обвинител Олександр Клименко тврдеше дека „Али Баба“ давал задачи за притисок врз истражители и обвинители.
Според Дарја Калениук од Центарот за антикорупциско дејствување, претресите најчесто се вршат непосредно пред поднесување обвиненија, што може да значи дека обвиненијата против Ермак се неизбежни и многу блиску.
Пратеник од партијата на Зеленски „Слуга на народот“ изјави дека засега во партијата нема големи реакции: „Повеќето одамна претпоставуваа што се случува. Малкумина реагираа, некои се во шок.“
Тој додаде дека дел од владејачката структура верувале дека назначувањето на Ермак за шеф на мировните преговори ќе ја затвори оваа приказна, „но очигледно ова е само почетокот.“
