Микробиологот Никола Пановски во вечерашната емисија „Топ тема“ на ТВ Телма објасни дека поимот „ентеробактерија“ сам по себе не значи ништо конкретно, бидејќи станува збор за „најголемата фамилија на бактерии“ со над стотина видови.
„Ешерихија коли ја имаме сите во огромни количини, исто како Клепсиела и Протеус. Постојат и опасни видови, но 99 отсто од нив не се опасни. Во оваа група се и салмонела, шигела и многу други. Затоа поимот ентеробактерија, па дури и ако се најде во чешмите, најчесто укажува на недоволна хигиена – најчесто пренесена преку неизмиени раце,“ рече Пановски.
Тој потенцираше дека вистинска причина за тревога би била доколку биле откриени салмонела или други специфични патогени: „Да кажеше некој ‘салмонела најдовме’, ќе правевме сосема друг муабет.“
Пановски појасни дека процесите на инкубација се различни и зависат од видот на контаминацијата. За салмонелата инкубацијата е од два до пет дена, но за да предизвика масовно заболување, во храната мора да има живи бактерии во голем број.
„Во мусака, на пример, не може да има толку живи бактерии за да зарази толку многу деца. Може да има интоксикација од претходно создадени токсини,“ додаде тој.
Според Пановски, се разликуваат три типа алиментарни нарушувања:
Алиментарна интоксикација – внесување готов токсин, најчесто создаден од габи, со инкубација од еден до шест часа. Алиментарна токсикоинфекција – внесување токсин и живи бактерии; симптомите почнуваат брзо и траат со денови. Алиментарна инфекција – инкубација од еден до пет дена, почнува со дијареа и температура, а не со повраќање како кај токсините.
„Така што, најверојатно не се работи за труење со храна, туку за цревна инфекција,“ заклучи микробиологот.
