Силните снежни врнежи што ја зафатија Србија предизвикаа сериозни проблеми во сообраќајот. На автопатот „Милош Велики“ сообраќајот речиси целосно запре, а патот кон Дивчибаре остана затрупан и нерасчистен, со заглавени возила во снежни наноси.
РХМЗ издаде предупредувања за снег, поледица и опасни услови, особено во Хомоље и источните и југоисточните планински региони, каде дождот се замрзнува на тлото. Во југозападна Србија се очекува дополнително зголемување на снежната покривка.
На Златибор повторно има силни врнежи, а сообраќајот се одвива отежнато. Забраната за камиони е повторно воведена, а екипите работат на расчистување на патиштата.
Снег врнеше цела ноќ, а најавите се дека ќе продолжи. Во Белград вечерта се очекуваат врнежи од дожд и снег, со дополнителни предупредувања за опасни услови на патиштата.
