Украинските сили за беспилотни системи соопштија дека во тридневна координирана операција успеале да неутрализираат три руски противвоздушни системи – Бук-М1, Бук-М2 и Тор-М2 – со вкупна проценета вредност од околу 60 милиони долари.
Според нивното соопштение на Телеграм, нападите биле изведени од операторите на баталјонот „Асгард“ од 412-та бригада „Немезис“, заедно со 12. Центар за специјални намени и единицата „Кабул 9“ при украинската воено-разузнавачка служба (HUR). Целите биле три стратешки важни руски ПВО-системи, кои играат клучна улога во заштитата на руските позиции.
Уништениот Бук-М1 е мобилен систем со среден дострел, наменет за пресретнување авиони и ракети, додека Бук-М2 претставува понов модел со понапредни радарски способности. Тор-М2, пак, служи за соборување дронови и нисколетечки проектили.
Украинската страна соопшти дека губитокот на овие системи „значително го ослабува“ рускиот противвоздушен штит на неколку стратешки точки, во период кога Украина ги засилува далекомерните дрон-удари врз Русија и окупираните територии.
Во ноќта на 28 ноември, специјалниот баталјон Madyar’s Birds погодил и рафинерија во Саратов, едно од најважните руски енергетски постројки. Командантот Роберт „Madyar“ Бровди најави дека операциите ќе станат уште поинтензивни, особено насочени кон руските капацитети за гориво, како одговор на нападите врз украинската енергетска инфраструктура.
Во последните недели, украинските дрон-единици изведоа повеќе високо-прецизни удари, меѓу кои напад врз фабриката за бром „Перкоп“ и трансформаторска станица на Крим, како и уништување на база со руски дронови „Орион“. Единицата „Рејд“ од 413-та полковска група, исто така, уништи ретко руско напаѓачко возило на границата меѓу Дњепропетровска и Донецка област, попречувајќи го напредувањето на руските сили.
