Украинската морнарица, во координација со силите за специјални операции, изведе прецизен напад врз руската авио-база Саки на окупираниот Крим, соопштија украинските воени извори. Ударот, извршен на 28 ноември, резултирал со уништување на командно-контролниот центар, складишта за дронови и неколку системи за противвоздушна одбрана, пренесува Euromaidan Press.
Главна цел на операцијата била да се ослабат руските борбени капацитети на окупираните територии. Според соопштението, уништени се складишта со беспилотни летала од типот „Орион“, како и ПВО-системи Tor-M2 и Pantsir-S1. Дополнително, украинските сили погодиле и ЗУ-23-2 противвоздушен систем монтиран на камион KamAZ.
Украинската морнарица соопшти дека овој прецизен удар значително ја намалува руската способност за одбрана и ја поддржува пошироката кампања за ослободување на окупираните делови од земјата.
Нападот врз базата Саки е дел од поширока серија украински операции со дронови и проектили насочени кон руската воена и економска инфраструктура. Во раните утрински часови истата ноќ биле погодени и нафтена рафинерија во Саратовската област – едно од најголемите руски постројки за преработка – како и воени цели во регионите Доњецк и Луганск.
Украина наведува дека целта на овие координирани удари е „намалување на рускиот воено-економски капацитет, нарушување на снабдувањето на окупациските сили и ограничување на способноста на Русија да води долготрајни воени операции“.
