Поранешната министерка за внатрешни работи, Гордана Јанкуловска, упати силна реакција на соопштението на СДСМ, во кое партијата ја обвини дека се обидува да се претстави како жртва и ја доведе нејзината жалба до Европскиот суд за човекови права во контекст на „потсвесна врска со процесите против нацистите“.
Јанкуловска возврати дека нема причина СДСМ да се чувствува засегнат од нејзината апликација до ЕСЧП, „освен ако предметите навистина не се суделе кај нив во штаб“.
„Зошто СДСМ би се нашле засегнати и повикани за коментар за апликација пред ЕСЧП во која се бара да се утврди повреда на Правото на правично судење која ја сторила некоја ‘независна’ судијка во некој предмет што се водел пред Кривичниот суд, небаре предметот се судел кај нив во штаб? Ама според реакцијава, изгледа сепак таму се судел“, напиша Јанкулоска.
Од СДСМ, пак, во својата реакција потенцираат дека одлуката на Европскиот суд да ја прифати апликацијата е чисто формален процесен чекор и не претставува никаква оценка на суштината на случајот. Порачуваат дека во оваа фаза судот проверува само дали се исполнети процесните предуслови – исцрпени правни лекови, навремено поднесена жалба, статус на жртва и усогласеност со Конвенцијата.
„Тоа е стандардна процедура според член 35 од Европската конвенција“, велат од партијата, додавајќи дека не е ниту етички ниту правно коректно да се коментира материјалната суштина додека судот не започне со анализа.
Оваа полемика следи по официјалната информација дека Европскиот суд за човекови права ја прифатил апликацијата на Јанкуловска за наводно повредено право на правично судење, поврзана со случајот „Тенк“, за кој таа во целост ја одработи затворската казна.
