Комитетот на Обединетите нации во петок го повика Израел да формира независна истражна комисија која ќе ги испита тврдењата за тортура врз Палестинците, предупредувајќи дека ситуацијата „значително се влошила“ од почетокот на војната во Газа.
Комитетот изрази „длабока загриженост поради извештаите кои укажуваат на де факто државна политика на организирана и широко распространета тортура и лош третман“ во Израел. Иако едногласно го осуди нападот на Хамас и други групи врз Израел на 7 октомври 2023 година, комитетот истакна дека е загрижен за „нерамнотежата во израелскиот одговор на тие напади“.
Експертите го критикуваа „низот политики што Израел ги спровел за време на својата непрекината нелегална присутност на окупираната палестинска територија“, предупредувајќи дека тие можат да доведат до „сурови, нехумани или понижувачки услови за живот за палестинското население“.
Комитетот го повика Израел да „основa независна, непристрасна и ефикасна ad hoc истражна комисија која ќе ги испита сите тврдења за тортура и лош третман извршени за време на актуелниот вооружен конфликт“. Исто така, Израел треба „да ги процесуира одговорните, вклучувајќи надредени офицери, и да овозможи итен влез на неопходна хуманитарна помош и работници во Газа“.
За време на ревизијата во Женева, известувачот Питер Ведел Кесинг ѝ рече на израелската делегација дека експертите „се длабоко згрозени од описот што го примивме… она што изгледа како систематска и широко распространета тортура и лош третман на Палестинците, вклучувајќи деца“.
Извештајот го истакнува широко користење на методи на тортура, вклучувајќи „повторено сериозно претепување, напади со кучиња, електрошокови, тортура со вода, долготрајни стресни позиции и сексуално насилство“.
Израелскиот амбасадор во ООН во Женева, Даниел Мерон, ги отфрли овие тврдења, нарекувајќи ги „дезинформации“, додавајќи дека Израел е „посветен на исполнување на своите обврски според моралните вредности и принципи, дури и со предизвиците што ги поставува терористичката организација“.
